काठमाडौं । सरकारले अन्तरराष्ट्रिय हवाई उडान संख्या थप गर्ने निर्णय गरेको छ । बिहीबार प्रधानमन्त्री केपी शर्मा ओली, उपप्रधान एवं रक्षामन्त्री ईश्वर पोखरेल, पररास्ट्र मन्त्री प्रदीपकुमार ज्ञवाली, पर्यटन मन्त्री योगेशकुमार भट्टराई र श्रम मन्त्री रामेश्वर राय यादवबीच भएको बैठकले अन्तरराष्ट्रिय उडानको संख्या थप गर्ने निर्णय भएको हो ।
सरकारले पिसिआर रिपोर्ट नेगेटिभ भएका यात्रु मात्र ल्याउने गरी नियमित उडान भएका मुलुकमा एयरलाइन्सहरुले थप उडान माग गरेमा अनुमति प्रदान गर्ने निर्णय गरेको हो ।
मन्त्री भट्टराईले कुनै कम्पनीले कम्पनी कै खर्चमा कामदारलाई नेपाल फर्काउन चाहेमा त्यसलाई प्राथमिकतामा राखेर उडान अनुमति प्रदान गरिने जानकारी दिए ।
त्यस्तै उनले श्रम कल्याणकारी कोषबाट उद्धार गर्नु पर्नेहरुका लागि श्रम मन्त्रालयले सम्बन्धित देशको नियोगसँग समन्वयमा उडानको व्यबस्था गरिने जनाए ।
‘नियमित उडान नभएका मुलुकमा पिसिआर रिपोर्ट नेगेटिभ भएका यात्रुका लागि मागका आधारमा उडान संख्या थप गरिनेछ’, मन्त्री भट्टराईले भने, ‘बिदेशी भुमीमा अप्ठ्यारो अवस्थामा रहेका नेपालीप्रति सरकार संबेदनशील छ ।’
मन्त्री भट्टराईले विदेशमा रहेका नेपालीहरुको स्वदेश फिर्तीका लागि सरकारले सक्दो कोशिस गरिरहेको बताए ।
