काठमाडौं । नेपाल बायुसेवा निगमको वाईडबडी जहाजले आगामी फागुन १९ गतेदेखि जापानको नारिता नियमित उडान गर्ने तयारी अन्तिम चरणमा पुर्याएको छ । जापानको नारिता विमानस्थलमा उडान शुरु भएसँगै निगमले हाल उडान गरिरहेको जापानकै अर्को गन्तब्य ओसाका उडान भने पूर्णरुपले बन्द गर्ने भएको छ । निगमले नारितामा हप्तामा ३ दिन सोमबार, बुधबार र शुक्रबार उडान गर्नेछ ।

निगमले नारितामा २६ सेप्टेम्बर देखी चार्टर उडान गर्दै आएको थियो । तर, अब भने फागुन १९ गतेदेखि नियमित उडान गर्न लागेको हो । काठमाडौं–नारिताको पहिलो उडानका लागि हालसम्म ५५ जनाले टिकेट खरिद गरिसकेका छन भने नारिता–काठमाडौंका लागि १ सय ४० जनाले टिकट खरिद गरिसकेको निगमका प्रवक्ता अर्चना खडकाले जानकारी दिइन । त्यस्तै दोस्रो उडानको लागि काठमाडौं–नारिता ११ जना र नारिता–काठमाडौंका लागि १ सय २२ जनाले टिकट खरिद गरिसकेका छन ।

काठमाडौंबाट नारिता सीधा उडान एकतर्फी ४० हजार र दुईतर्फी ८० हजार रुपैयाँमा निगमले टिकट बिक्री गरिरहेको छ । यो गन्तव्यमा निगमले रातको १ बजे उडान गर्ने भएको छ । करिब १५ घण्टाको नारिता उडान ओसाकाभन्दा आधा घण्टामात्रै लामो हुने खडकाले जानकारी दिइन ।

उनका अनुसार जापान सिभिल एभिएसन ब्युरो (जेक्याप) ले निगमलाई उडान अनुमति दिए पनि अन्तिम स्वीकृति भने आउन बाँकी रहेको छ । तथापि जेक्यावले टिकट बुकिङ खुला गर्न अनुमति दिएकाले टिकट बिक्री गरेको प्रवक्ता खडकाले बताईन । निगमले ओशाका उडानमा घाटा ब्यहोरेको भन्दै नारिता उडान गर्न लागेको हो ।

निगमका प्रवक्ता खडकाका अनुसार नारिता उडानमा समेत घाटा हुने अवस्था आयो भने अन्य शहरमा जान सकिने छ । उनले भनिन, ‘ओशाका हामीले पहिले नै उडान गरेको हो त्यसैले केही सहजताका लागि मात्रै हामी त्यहाँ गएका हौं । त्यो भन्दा उपलब्धिमुलक नयाँ अर्को गन्तब्य भेटेमा हामी नारिता पनि बन्द गरेर नयाँ गन्तब्य जाने छौं ।’

त्यस्तै निगमले वाईडबडी तथा न्यारोबडी खरिद गर्दा लिएको ऋणको पुसको किस्ता एकमुष्ट रकम १ अर्ब १ करोड रुपैयाँ बुझाएको छ । वाइडबडी जहाज भित्रिएपछि निगमले समयमा नै अन्तरराष्ट्रिय उडानको व्यवस्थापन मिलाउन नसक्दा र निगमले लिएको २४ अर्ब रुपैयाँको ऋण सावा ब्याज भुक्तानी गर्न नसक्ने अवस्थामा पुगेको बेला उक्त रकम बुझाएको हो ।

हरेक तीन महिनामा निगमले वाइडबडीको ८० करोड ८२ लाख रुपैयाँका दरले तिर्नुपर्छ भने न्यारोबडीका लागि ३३ करोड ९ लाख रुपैयाँ जहाज खरिदबापत लिएको ऋणको किस्ता तिर्नुपर्छ । तर, निगमले हालसम्म संचयकोषको ४४ करोड रुपैयाँ बुझाएको छ भने नागरिक लगानी कोषको ५७ करोड रुपैयाँ मात्रै बुझाएको छ ।

निगमका जहाज ग्राउण्डेड

निगमको आन्तरिक उडानमा अहिले समस्या देखिएको छ । निगमले अहिले ४ ओटा जहाजबाट मात्रै आन्तरिक उडान गरिरहेको छ । निगमका अनुसार चिनियाँ जहाज एमए ६० एक, वाई १२ एक र ट्वीनअटर २ ओटाले मात्रै उडान गरिरहेका छन् भने अन्य साना जहाजहरु ग्राउण्डेड अवस्थामा छन् । निगमका अनुसार ३ वाई १२, एमए ६० जहाज १ र २ ओटा ट्वीनअटर ग्राउण्डेड छन् ।

निगमले बारम्बार ग्राउण्डेड भएको जहाजलाई मर्मत गर्दै संचालनमा ल्याउने बताए पनि समयमै मर्मत गर्न नसकेको अवस्था छ । केहीसमय अगाडि संस्कृति पर्यटन तथा नागरिक उड्डयन मन्त्री योगेश कुमार भट्टराईले समेत ग्राउण्डेड जहाज संचालनमा ल्याउन निर्देशन दिएको थिए । तर पाटपुर्जा चीनबाट ल्याउन नसकेको भन्दै निगमले ती जहाजहरु अझै संचालनमा ल्याउन सकेको छैन् ।

निगमले भने साना जहाजलाई संचालनमा ल्याउन नसक्दा निगमको त िजहाजबाट आम्दानी भन्दा बढी खर्च भइरहेको छ । निगमका प्रवक्ता खडका चिनियाँ जहाज एमए ६० र वाई १२ जहाज सुरुदेखि नै ग्राउण्डेड भईरहकोले समस्या आएको बताउाछिन् ।