काठमाडौं । नेपाल वायुसेवा निगमको वाईडबडी जहाजले बिहीबार बिहान साढे २ बजे जापानको ओशाका उडान गर्ने भएको छ ।

आजराती साढे २ बजे हुने उडानमा करिब १३० जना यात्रु रहने छन । निगमका प्रवक्ता गणेश बहादुर चन्दका अनुसार हाल सम्म ९० जनाले टिकट खरिद गरेका छन । बाँकी यात्रु भने निगम र मन्त्रालयलगायतका अन्य प्रतिनिधिहरु रहने छन ।

निगमका एक उच्च श्रोतका अनुसार निगमले आमजनतामा भ्रम फैलाउँदै निगमलाई भार पर्ने काम गरेको आरोप लगाएका छन । ‘निगमले अहिले सम्म करिब ३० ओटा भन्दा बढी टिकट बिक्री गर्न सकेको छैन १३० जनाको टिकट कहाँबाट ल्यायो’, श्रोतले भन्यो, ‘काठमाडौं–जापान एक पटक उडान अवतरण गर्दा करिब ३ देखि ५ करोड रुपैयाँ खर्च हुन्छ निगम आफैंले ब्यहोर्ने गरी ति सबै प्रतिनिधिलाई जापान घुमाउँदै छ ।’

निगम भने संचयकोष र नागरिक लगानीकोषबाट लिएको ऋण समेत तिर्न नसक्ने भन्दै सरकारसँग २० अर्ब रुपैयाँ सहयोग माग गर्दै आईरहेको छ । तर पछिल्लो समयमा प्रधानमन्त्री केपी शर्मा ओलीले भने निगमलाई एक पैसा पनि दिन नसक्ने बताउँदै आएका छन ।

निगमलाई टाँट पल्टाउने खेलमा लागेको भन्दै निगमभित्रै कार्यकारी अध्यक्ष मदन खरेलको विरोधगर्नेहरु नभएका भने होईन तर आफ्नो रोजीरोटीको पनि कुरा आउने भन्दै भित्री कुरा खोल्न नचाहेको श्रोतले जानकारी दिएका छन ।

तर निगमका प्रवक्ता चन्दले भने जापान उडानको तयारी पूर्ण रुपमा भएको र बजारमा आएको जस्तो २०÷३० ओटा मात्रै टिकट बिक्री नभएको बताउँछन । चन्दका अनुसार अहिले सम्म ९० ओटा टिकट गईसकेको र ५ बजे सम्म अझै बढ्न सक्ने बताउँछन ।

निगमको वाईडबडी ए ३३०–२०० जहाज मार्फत काठमाडौंबाट बिहीबार बिहान २ बजेर ३० मिनेटमा उडेको विमान स्थानीय समयअनुसार दिनको ११ बजेर ५५ मिनेटमा ओशाका पुग्नेछ र ओशाकाबाट स्थानीय समयअनुसार १ बजेर ५५ मिनेटमा उडान गरी सोही दिन बेलुका ६ बजे काठमाडौं आइपुग्नेछ ।

निगमले अहिले १ महिनाका लागि एकतर्फी भाडादर भने ३६ हजार ९ सय ९९ कायम गरेको छ ।