काठमाडौं । चौधरी समूह (सिजी)ले चितवनको भरतपुरमा निर्माण गरेको ल्याण्डमार्क कम्प्लेक्समा सुविधा सम्पन्न होटल सञ्चालनमा ल्याएको छ ।
‘सिजी हस्पिटालिटी’ अन्तर्गत द फर्न रेजिडेन्सीको नामबाट (चेन होटल) चार तारेसरहको सुविधा दिने गरी सञ्चालनमा ल्याइएको उक्त होटलले यही महिनामाटै सेवा दिने भएको छ ।
नेपाल भित्रने पर्यटकका लागि चितवन तेस्रो गन्तव्य हो । यस क्षेत्रमा जंगल सफारी र व्यावसायिक प्रयोजनको लागि घुमघाम गर्न आउने पर्यटकलाई लक्षित गर्दै सिजीले उक्त होटल सञ्चालनमा ल्याएको जानकारी दिएको छ ।
होटलका महाप्रबन्धक सुरज थापाका अनुसार बहुतले भवनको पाँचौँ तल्लादेखि दशौँ तल्लासम्म ४८ कोठा रहेका छन् । सबै कोठाबाट भरतपुरको मनोरम दृश्यावलोकन गर्न सकिनेछ । छैटौँ तल्लामा पौडी पोखरी, अपाङ्गमैत्री कोठा र दुई वटा १५० जना अट्ने सभा कक्ष रहेका छन् ।
होटलले प्रयोगमा आएका पानी र ठोस पदार्थलाई प्रशोधन गरी पुनः प्रयोगमा ल्याएको छ । यो समूहले ‘द फर्न रेजिडेन्सी’ ब्राण्डमा यसअघि काठमाडौँको सोल्टीमोडमा व्यावसायिक होटल सञ्चालनमा ल्याइसकेको छ । जिल्लाको मेघौलीमा पनि चौधरी समूहको होटल ताज रहेको छ ।
चेन होटल द फर्न रेजिडेन्सी नेपाल भारत र युरोपमा गरी ६३ वटा छ । भवनमा सपिङ कम्प्लेक्स, फुडकोर्ट, सिनेमा घर, रिक्रिएशन सेन्टर, बैंक, ट्राभल एजेन्सीसहितको सुविधा रहेको छ /रासस
