काठमाडौं । नेपाल वायुसेवा निगमले आन्तरिक उडानमा रहेका सबै जहाजलाई पूर्ण क्षमताकासाथ सञ्चालनमा ल्याउने तयारी गरेको छ ।
विमान चालक (पाइलट) को अभाव र मर्मतका लागि ग्राउण्डेड भएका जहाजलाई साता दिनदेखि एक महीनाभित्र सबै जहाज चलाउने तयारी भइरहेको निगमले जानकारी दिएको हो ।
पछिल्लो समयमा पाइलट अभावले सबै चिनियाँ जहाज ग्राउण्डेडलगायतका समाचार सञ्चार माध्यममा आएका थिए । निगमका सहायक प्रवक्ता नवराज कोइरालाले केही जहाज पाइलट अभाव तथा मर्मत भईरहेकाले पूर्णरुपमा जहाज उडाउन नसकिएको बताएका छन ।
‘वाई–१२ जहाजमध्ये केही एक साताभित्र उडाउँछौँ, बाँकी जहाजको पनि पाइलटको व्यवस्था गरी छिट्टै पूर्ण रुपमा सञ्चालन गर्ने योजनामा छौं’ कोईरालाले भने । सहायक प्रवक्ता कोइरालाका अनुसार निगमका ३ पाइलटमध्ये २ जनाले बिरामी बिदा लिएको र १ पाइलट प्रोफिसियन्सी चेक (पिपिसी) का लागि बुधबार चीन जानेछ । फर्केपछि आगामी १५ तारिखदेखि वाइ १२ को उडान सुरु गरिनेछ ।
पाइलट अभावले वाई १२ चार वटा जहाज उड्न नसकेको निगमको भनाइ छ । अहिले ३ वटा ट्वीनअटर जहाजले मात्र आन्तरिक उडान गरिरहेको छ । २ एमए–६० जहाजमध्ये एक मर्मतमा रहेको र अर्को ‘टु यर्ली’ चेकको क्रममा रहेकोले यो जहाजले पनि छिट्टै उडान भर्ने निगमले जानकारी दिएको छ ।
निगमसँग आन्तरिक उडानका लागि २ एमए ६०, ४ वाई–१२, र ३ ट्वीन अटर गरी ९ ओटा जहाजले विभिन्न २२ गन्तव्यमा उडान भर्दै आएका छन् ।
