काठमाडौं । अंग्रेजी नयाँ वर्ष सुरु भएसँगै काठमाडौं, पोखरा चितवन लगायतका होटल आन्तरिक पर्यटकले भरिभराउ भएका छन ।
विशेष गरी अंग्रेजी नयाँ वर्षमा विदेशी पर्यटकहरु आफ्नै परिवारसँग बस्ने भएकाले पनि आन्तरिक पर्यटकहरुको चहलपहल बढी हुने होटल एशोसिएशन अफ नेपाल (हान) का महासचिब विनायक शाहले जानकारी दिए ।
उनका अनुसार अहिले नयाँ वर्षको अवसरमा आन्तरिक पर्यटक मात्रै करिब १० देखी १५ लाखको हाराहारीमा हुने र विदेशी पर्यटक भने ५ देखी ७ लाख मात्रै हुने अनुमान रहेको छ ।
अरु बेला महंगो हुने भएकाले पनि ट्राभल एजेन्सिज तथा होटलहरुले यो अवसरमा विशेष प्याकेजको घोषणा गर्ने गरेको महासचिव शाहको भनाई रहेको छ । अहिले सार्वजनिक गरेका प्याकेजहरु अरु बेलाको तुलनामा ४० प्रतिशत सम्म सस्तो हुने शाहको दाबी रहेको छ ।
‘अहिले काठमाडौं, पोखरा चितवन लगायतका होटलहरुमा विदेशी पर्यटक भन्दा आन्तरिक पर्यटकको चहल पहल बढी छ,’ उनले भने, ‘नयाँ बर्षको अवसर पारेर हरेक होटलहरुले डिसेम्बर अन्तिम दिनमा बिभिन्न कार्यक्रमहरु समेत राखेको छ ।’
त्यस्तै पर्यटकलाई आकर्षित गराउन होटलहरुले बिभिन्न प्याकेजमार्फत विशेष छुट दिने भएको छ । अंग्रजी नयाँ वर्ष मनाउन बागलुङ भित्रने पर्यटकले १ सय रुपैयाँमा कोठा पाउने भएको छ भने पोखरामा ५ सय रुपैयाँ देखी ३ हजार रुपैयाँ सम्मको कोठाहरु रिर्जभ भएको हानका महासचिव शाहको भनाई रहेको छ ।
नयाँवर्षकै अवसर पारेर पर्यटक लक्षित भैरहवामा विशेष महोत्सव हुने भएको छ । जहाँ अरुबेलाको तुलनामा ४० प्रतिशत सम्म छुट पाउनेछन । महोत्सवमा पेय पदार्थ देखी, नाचगान, खान बस्न लगायतका प्याकेज रहेको उनले जानकारी दिएका छन ।
