काठमाडौं । नेपाल वायुसेवा निगमको नयाँ वाईडवडी जहाज ‘अन्नपुर्ण’ १० दिन देखि ग्राउण्डेड छ । निगमको वाईडबडी ए ३३०–२०० जहाजको ईन्जिनमा समस्या आए पछि कार्तिक १५ गतेनै कतारको दोहामा ग्राउण्डेड भएको थियो ।
सो जहाजको दोहामा सामान्य मर्मत पछि काठमाडौं ल्याएको र काठमाडौं आएको केहीदिनमै पुनः ग्राउण्डेड भएको निगमले जानकारी दिएको छ । निगमका अनुसार सो जहाज ग्राउण्डेड हुँदा दैनिक १ लाख ७२ हजार ८ सय ४५ रुपैयाँ त्रिभुवन अन्तरराष्ट्रिय विमानस्थल (टीआईए) लाई पार्किङ शुल्क बुझाउनु पर्ने हुन्छ ।
निगम श्रोतका अनुसार सो जहाज कार्तिक २३ गते देखि ग्राउण्डेड रहेको छ । हाल मर्मत भईरहेको ‘अन्नपुर्ण’ जहाज बुधबारमात्रै बन्न सक्ने निगमले जानकारी दिएको छ । उक्त जहाजले ग्राउण्डेड भए देखि कार्तिक ५ गते बुधबारसम्मको पार्किङ शुल्क मात्रै २२ लाख ४६ हजार ९ सय ८५ रुपैयाँ तिर्नु पर्ने हुन्छ ।
ल्याएको ४ महिना नपुग्दै जहाजमा समस्या आईपरेको निगमका एक अधिकारीले जानकारी दिएका छन । उनका अनुसार नयाँ जहाजमा तत्कालै त्यस्तो समस्या आउनु नपर्ने हो तर भई दियो त्यस्तै जसले गर्दा दैनिक उडानमा समेत प्रभाव परिरहेको छ ।
हाल अन्तरराष्ट्रिय उडान गर्दे आईरहेको सो विमान ग्राउण्डेड भए पनि कुनै उडान रद्द भने नभएको निगम श्रोतले जानकारी दिएको छ । श्रोतका अनुसार उडान तालिका केही हेरफेर हुँदा दिल्ली उडानमा भने केही प्रभाव परेको देखिन्छ ।
दैनिक १ करोड रुपैयाँ भन्दा बढी घाटा ब्यहोर्नु पर्ने संस्थाको जहाज ग्राउण्डेड हुँदा थप समस्या झेल्नु परेको निगमका एक उच्च अधिकारीले सुनाए । ति अधिकारीका अनुसार निगम नराम्रो सँग थला परेको छ । साथै यही गतिमा निगम अघि बढ्ने हो भने र सरकारले सहायता नगर्ने हो भने निगम कहिल्यै उठन नसक्ने गरी थला पर्ने उनको दावी थियो ।
