सिङ्गापुरदेखि छिमेकी देश मलेसियाको राजधानी क्वालालम्पुरसम्मको एक घण्टाको हवाई यात्रा विश्वकै सबैभन्दा व्यस्त एयर रुट मानिन्छ । गत वर्षको फेब्रुअरीदेखि एक वर्षको अवधिमा यो रुटमा ३० हजार ५३७ ओटा उडान भएको ओएजी एभिएसन वर्ल्डवाइड लिमिटेडले जनाएको छ । यो दैैनिक औषत ८४ ओटा जहाज उडान हुन आउँछ ।
विश्वका व्यस्त बीस एयर रुटमा अधिकांश एसियाकै रहेको छ । एसिया बाहिर न्यूयोर्क र टोरन्टो सबैभन्दा अगाडी छ । यी दुई स्थानबीचको रुटमा एक वर्षमा १६ हजार ९५६ ओटा उडान भएको तथ्यांक छ । त्यस्तै डुब्लिन र हिथ्रो बीचको उडान व्यस्तताको हिसाबले १४ औं स्थानमा छ । यहाँ वर्षेभर १४ हजार ३९० ओटा उडान भएका छन् ।
हवाइ यात्रुको संख्याको हिसाबले हङकङदेखि ताइपेइसम्मको रुट सबैभन्दा अघि छ । यो रुटमा विगत एक वर्षमा ६५ लाख यात्रुले उडान गरेका छन् । जकार्ता र सिंगापुर दोस्रो स्थानमा छ जहाँ ४७ लाखले उडान गरेका छन् भने व्यस्त रुट क्वालालम्पुर र सिंगापुरमा ४० लाखले उडान गरेका छन् ।
एसिया विश्वकै तीव्र गतिमा अघि बढेको यात्रा बजारका रुपमा देखिएको छ । तर आन्तरिक विमानस्थलका हिसाबले भने अन्तरराष्ट्रिय रुटको तुलनामा सियोलदेखि दक्षिण कोरियाको जेजु आइल्याण्डसम्मको रुट सबैभन्दा व्यस्त रहेको छ । यो रुटमा वर्षभर ६५ हजार उडान भएका छन् ।
