राङडोल लामा
काठमाडौँ । पर्यटन विभागले ३५ ओटा ट्राभल एजेन्सि खारेजीको प्रक्रिया अघि सारेको छ । नविकरणमा अपुग रकम बुझाएको भन्दै विभागले खारेजी प्रक्रिया अघि बढाएको हो ।
नविकरणको लागि १० दिने सूचना प्रकाशित गरे पनि सम्बन्धित निकायहरुले चासो नदेखाए पछी खारेजी गर्न लागेको विभागका प्रवक्ता लक्षमण शर्माले जानकारी दिए ।
‘ट्राभल वा ट्रेकिङ व्यवसाय संचालन गर्न इजाजत प्राप्त संघ संस्थाले नविकरणमा अपुग रकम जम्मा गरे पछी मन्त्रालय संगको सहकार्यमा ३५ व्यवसायी खारेज गर्न लागेका हौं’ उनले भने ।
चालु वा चुक्ता पुँजी तथा सुरक्षण बापतको बैंक ग्यारेण्टी रकम कायम नगरिएको तथा अपुग रकम बुझाएको भन्दै विभागले माघ १५ देखि सूचना निकालेको थियो ।
माघ २५ सम्म रकम वुझाउन पर्नेमा कम्पनीहरु सम्पर्कमै नआएका हुन् ।
शर्माका अनुसार बैंक ग्यारेण्टी रकम कम्तिमा ५ लाख कायम गर्ने, चुक्ता पुँजी फर्मको हकमा कम्तीमा रु १० लाख तथा कम्पनीको हकमा कम्तिमा रु २५ लाख कायम गर्ने कार्य ६० दिन भित्र गरिसक्नु पर्ने नियम छ ।
यसरी नविकरण नगरेका ट्राभल वा ट्रेकिङ एजेन्सिहरुमा नेपाल माउन्ट भ्यु इन्टरनेशनल प्रालि, हिमाल मन्डप जर्नी प्रालि, स्याटलाईट ट्रेक्स एण्ड एक्सपिडिसन प्राली लगायत ३५ ओटा ट्राभल छन् ।
