काठमाडौं । ट्रेकिङ व्यवसायीको छाता सङ्गठन ट्रेकिङ एजेन्सीज एसोसिएसन अफ नेपाल(टान)को अध्यक्षमा नवराज दाहाल विजयी भएका छन् ।
आइतबार राती सम्पन्न मतगणना अनुसार दाहालले आफ्ना प्रतिस्पर्धि मोहन लम्साललाई १८ मतले पराजित गर्दै दुई बर्षका लागि टानको नेतृत्व प्राप्त गरेका हुन् ।
बाम गठबन्धनका तर्फबाट उम्मेदवार बनेका दाहालले ३३१ म्त प्राप्त गरेको निर्वाचन समितीले जनाएको छ । त्यस्तै लोकतान्त्रिक गठबन्धनका उम्मेदवार लम्सालले ३१३ मत प्राप्त गरेका थिए । अध्यक्षमा स्वतन्त्र उम्मेदवारी दिएका नुरु जांबु शेर्पाले ५० मत प्राप्त गरेका छन् ।
पदाधिकारीमा भने बाम गठबन्धन र लोकतान्त्रिक गठबन्धनका तर्फबाट मिश्रित नतिजा आएको छ ।
दाहाल नेतृत्वको बाम गठबन्धनबाट प्रथम उपाध्यक्ष जीवन थापा मगर, आङ पेम्बा शेर्पा, सचिव सुजन लामिछाने, कोषाध्यक्ष रामकृष्ण तिमल्सिना र सहकोषाध्यक्षमा तारा राना विजयी भएका छन् ।
लम्साल नेतृत्वको लोकतान्त्रिक गठबन्धनबाट वरिष्ठ उपाध्यक्ष खुम बहादुर केसी र द्वितीय उपाध्यक्ष निलहरी बास्तोला विजयी भएका छन् ।
निर्वाचनको नतिजा अनुसार महिला सदस्यमा ऋतु ग्याम्दान, सदस्यहरुमा रविन्द्र अधिकारी, राजन प्रसाद काप्री, गोपाल श्रेष्ठ, जीवन लामा, बाबुराम गुरुङ, सुक बहादुर लामा, शेर बहादुर परियार, जंग बहादुर लामा विजयी भएका छन् ।
