बिजखबर संवाददाता
२५ मंसिर, काठमाडौं । अख्तियार दुरुपयोग अनुसन्धान आयोगले नेपाल पर्यटन वोर्डका कर्पोरेट सेवा प्रबन्धक अनिल दाशलाई पदबाट निलम्बन गर्न निर्देशन दिएको छ । अख्तियारले संस्कृति पर्यटन तथा नागरिक उड्डयान मन्त्रालयलाई दाशलाई निलम्बन गर्न लिखित निर्देशन दिएको हो ।
बोर्डका तत्कालिन कामु कार्यकारी प्रमुख सुभाष निरौलाले करौडौं रुपैयाँ अनियमितता र भ्रष्टाचार गरेको उजुरीका आधारमा अख्तियारले अनुसन्धान थालेको छ । दास पदमै वसिरहँदा प्रमाण नस्ट गर्न सक्ने भन्दै निलम्बन गर्न निर्देशन दिएको हो ।
यसैगरी अख्तियारले विभिन्न कार्यक्रममा कर्मचारीबाट भएको पेश्की खर्च फछर्योट गर्न दिएको निर्देशनपछि बोर्डले केही रकम फछर्योट भएको जानकारी गराएको अख्तियारद्वारा जारी विज्ञप्तीमा उल्लेख छ ।
वोर्डका ३७ जना स्थायी कर्मचारीबाट ९९ लाख २७ हजार र करारमा रहेका १२ जना कर्मचारीबाट कार्यक्रम पेश्की वापत १७ लाख २६ हजार गरी (कुल एक करोड १६ लाख रुपैयाँ) लिएको थियो । तर, सो रकमको फछर्यौट गरिएको थिएन ।
अख्तियारले प्रकाशित गरेको विज्ञप्ति अनुसार निर्देशनपछि ९७ लाख ५२ हजार रुपैयाँ असुल गरिएकोे छ । वोर्डले ८८ लाख नौं हजार खर्च र ९ लाख ४२ हजार ब्याज रकमसहित असुल भएको जानकारी अख्तियारलाई दिएको छ । सो रकम वोर्डको बैंक खातामा दाखिला भइसकेको छ ।
