बिजखबर संबाददाता
२० भदौ,काठमाडौं । इण्टरनेट तथा सामाजिक सञ्जालका प्रयोगकर्ताहरुलाई लामो समय एउटै पासवर्ड प्रयोग नगर्न विज्ञहरुले सुझाएका छन् ।
नेपालमा साइबर अपराध बढ्दै गएकोले त्यसबाट बच्न यस्तो सुझाव दिएका हुन् ।
आइतवार काठमाडौँमा आयोजित ‘नेपालको साइबर सुरक्षा र चुनौती’ विषयक अन्तरक्रिया कार्यक्रममा यस्तो सुझाव दिइएको थियो । सो अवसरमा अर्थमन्त्री रामशरण महतले मुलुकलाई प्राविधिक रुपबाट अगाडी बढाउनुपर्ने बताए ।
डा.महतले वर्तमान अवस्थामा साइबर संसारबाट कोही मुक्त हुन नसक्ने स्पष्ट पारे । ‘देशलाई प्राविधिक तवरले सक्षम बनाउन सरकारले जस्तोसुकै भूमिका खेल्न तयार रहेको छ’ उनले भने ।
कार्यक्रममा प्रहरी वरिष्ठ उपरीक्षक सर्वेन्द्र खनालले साइबर अपराध देशमा बढ्दै गएकोले यसलाई रोक्न छुट्टै कानून आवश्यक रहेको बताए । डा रामहरि सुवेदीले आफ्नो विद्यावारिधिको क्रममा अध्ययन गरेको साइबर अपराधसम्बन्धी पाठ्यक्रम प्रस्तुत गरेका थिए ।
