काठमाडौं । एआई भिडियो स्टार्टअप रनवेले ३०८ मिलियन डलर बराबरको लगानी संकलन गरेको छ। उक्त लगानी चरणमा निजी इक्विटी कम्पनी जनरल एटलान्टिकले नेतृत्व गरेको हो। कम्पनीले यस लगानीमार्फत नयाँ मिडिया इकोसिस्टम विस्तार गर्ने योजना बनाएको छ।
नयाँ लगानीपछि अमेरिकाको न्युयोर्कमा आधारित यो कम्पनीको मूल्यांकन तीन अर्ब डलरभन्दा माथि पुगेको जनाइएको छ। यद्यपि कम्पनीले मूल्यांकनबारे केही प्रतिक्रिया दिएको छैन। रनवेले भविष्यमा आफ्नो एआई फिल्म तथा एनिमेसन स्टुडियोलाई केन्द्रमा राखेर नयाँ मिडियासम्बन्धी अनुसन्धानमा लगानी गर्ने जनाएको छ। कम्पनीले बनाउँदै गरेको वर्ल्ड मोडेलले वातावरणको आन्तरिक स्वरूप निर्माण गरी त्यसमा भविष्यमा हुनसक्ने घटनाहरूको अनुमान गर्न सक्ने क्षमतामा आधारित छ।
रनवेले बनाएको सफ्टवेयरले प्रयोगकर्तालाई केवल पाठ वा तस्बिर प्रयोग गरेर भिडियो तयार गर्न सक्ने सुविधा दिन्छ। कम्पनीले गएको सेप्टेम्बरमा लायन्सगेटसँग सहकार्य गरी फिल्म निर्माता र निर्देशकहरूलाई सहयोग पुर्याएने उद्देश्यले अनुकूलित भिडियो उत्पादन मोडेल विकास गर्ने सम्झौता गरेको थियो।
यसपटकको लगानीमा जापानी समूह सफ्टबैंक, चिप निर्माता एनभिडिया, फिडेलिटी म्यानेजमेन्ट एन्ड रिसर्च कम्पनी तथा बेलायतको बेल्ली गिफर्डजस्ता ठूला लगानीकर्ताहरूको समेत सहभागिता रहेको छ। कम्पनीले संकलित लगानी एआई प्रविधिमा आधारित नयाँ मिडिया निर्माणमा खर्च गर्ने जनाएको छ।
