काठमाडौं । नेपाल दूरसञ्चार प्राधिकरणले भू उपग्रह(स्याटालाइट) राख्न अन्तरराष्ट्रिय स्तरको टेन्डर आवह्वान गरेको छ । एनटिएले विदेशी लगानीकर्ता लाई लक्षित गर्दै बिहीवार आशयपत्र माग गरेर सार्वजनिक सूचना प्रकाशित गरेको हो ।
नेपालबाट बार्षिक रुपमा अर्वौ रुपैयाँ बाहिरिरहेको अवस्थामा प्राधिकरणले नेपालकै स्याटालाइट स्थापना गर्न लागेको प्राधिकरणका प्रवक्ता मीनप्रसाद अर्यालले जानकारी दिए । प्रतिशपर्धाका आधारमा विदेशी लगानीकर्तालाई स्याटालाइट राख्न आवह्वान गरेको हो ।
यसअघि स्याटालाइट राख्न नेपाली कम्पनीबारे अध्ययन भएपनि कुनै पनि योग्य नदेखिएकोले अन्तरराष्ट्रिय लगानीकर्ता खोज्न लागेको अर्यालले बताए । ‘नेपाली कम्पनीसँग स्याटालाइट सम्वन्धी प्राविधिक ज्ञान तथा लगानीको कमी भएकोले अन्तरराष्ट्रिय कम्पनी खोजेका हौं ’ उनले भने ।
प्राधिकरणका अनुसार इच्छुक कम्पनीले आगामी नोभेम्वर ११ भित्र आशयपत्र पेस गर्नुपर्ने छ । कम्पनीको आर्थिक क्षमता, प्राविधिक क्षमता,‘वर्क एक्सपेरियन्स’, ‘अपरेसनल एक्सपेरियन्स’लगायतको आधारमा छानिने छ ।
स्याटालाइट सम्वन्धि कम्तिमा ५ देखि १० बर्षको अनुभव भएको कम्पनीमात्र छनौट गरिने छ । आवेदन दिँदा अंग्रेजी भाषाको प्रयोग अनिवार्य छ ।
आशयपत्रमा कम्पनीबारे गलत सूचना उल्लेख गरेको पाइएको अवस्थामा रद्द गरिने बताइएको छ ।
नेपाललाई ८० डिग्री पूर्वी देशान्तरदेखि ८९ पूर्वी देशान्तरको ‘अर्बिटल स्लट’ उपयुक्त हुने उनीहरूको निष्कर्ष थियो । आईटीयूले दिएकै स्थानमा स्याटलाइट राख्दा त्यसको ‘फुटप्रिन्ट’ नेपालमाभन्दा अन्य मुलुकमा पर्ने भएकाले लागत बढी पनि उनीहरूको ठहर थियो ।
मन्त्रालयले तीन वर्षअघि गराएको प्रारम्भिक अध्ययनमा नेपालले स्याटलाइट राख्नका लागि शुरुमा ३० अर्ब खर्च गर्नुपर्ने देखाएको थियो । त्यस्तै स्याटलाइट राखिसकेपछि पनि १५ वर्षभित्र अर्को ३० अर्ब रुपैयाँ खर्च हुने अनुमान गरिएको थियो ।
