काठमाडौँ । २६ वर्षीय अमेरिकी युट्युबर जिम्मी डोनाल्डसन उर्फ मिस्टर बिस्ट अब विश्वमा सबैभन्दा धेरै सब्सक्राइबर भएका युट्युबर बनेका छन् । उनको च्यानल मिस्टर बिस्टमा मंगलबार बिहानसम्म २७ करोड सब्सक्राइबर पुगेका छन् ।

यससँगै जिम्मीले भारतीय म्युजिक लेबल टी–सिरिजको रेकर्ड तोडेका छन् । टी सिरिजको युट्युबमा २६ करोड ६० लाख सब्सक्राइबर छन् । यस च्यानलका मालिक चलचित्र तथा संगीत निर्माता भुषण कुमार हुन् । बिस्टले टी–सिरीजको कीर्तिमान तोडेपछि भनेका छन्– ’६ वर्षपछि मैले अन्ततः PewDiePie को बदला लिएको छु ।’ एक समय PewDiePie ले टी–सिरिजको सबैभन्दा धेरै सब्सक्राइब च्यानल भएको रेकर्ड पनि तोडेका थिए ।

यसपछि २०२० मा PewDiePie ले आफ्नो युट्युब च्यानल बन्द गरिदियो । त्यतिबेला उनका १०२ मिलियन सब्सक्राइबर थिए । एक समय सामाजिक सञ्जालमा PewDiePie र टी–सिरिज बीच सब्सक्राइबर बढाउने बारे निकै ठुलो प्रतिष्पर्धा थियो । टी सिरिज सन् २०१९ देखि युट्युबमा सबैभन्दा धेरै सब्सक्राइबर भएको च्यानलको रूपमा थियो, तर ‘मिस्टर बिस्ट’ ले अब यो रेकर्डलाई तोडेका छन् ।

‘मिस्टर बिस्ट’ युटुबमा आफ्नो खतरनाक र अनौठो भिडियोका लागि परिचित छन् । तिनी प्रायः मानिसहरूलाई जिउँदै गाड्ने वा १०० दिनसम्म सँगै बस्ने जस्ता चुनौतीहरू दिन्छन् । मिस्टर बिस्टले बिस्ट फिलान्थ्रोपी नामक एनजीओ पनि खोलेका छन्, जसको माध्यमबाट उनले आफ्नो परिवार, साथीहरू, फ्यानहरू र खाँचोमा परेका मानिसहरूलाई मद्दत गर्छन् । केहि समय अघि नेपालमा पनि उनले सिन्धुलीको एक अस्पतालको मर्मत गरिदिएका थिए ।