काठमाडौं । नेपाल टेलिकमका पहिलो महिला प्रवन्ध निर्देशक कामिनी राजभण्डारीले पदभार ग्रहण गरेकी छिन् । सरकार मन्त्रीपरिषद्को असोज ६ गतेको निर्णयले उनी प्रबन्ध निर्देशकमा कामिनी राजभण्डारी नियुक्त भएकि हुन् ।

उनी तीन वर्षका लागि नेपाल टेलिकमको प्रबन्ध निर्देशकमा नियुक्त भएकी हुन् । यसअघि राजभण्डारी टेलिकममा प्रमुख प्राविधिक अधिकृत पदमा कार्यरत हुनुहुन्थ्यो । टेलिकममा बरिष्ठत नायव प्रबन्ध निर्देशक मध्ये थिइन् । कम्पनीको केन्द्रीय कार्यालयमा आयोजित एक कार्यक्रमका बीच प्रबन्ध निर्देशकको पदभार ग्रहण गरेकी हुन् ।

पदभार ग्रहण गर्दै नवनियुक्त प्रबन्धक निर्देशक राजभण्डारीले विविध प्रविधिका दूरसञ्चार सेवा विस्तार गर्ने तथा प्रभावकारी ग्राहक सेवा उपलब्ध गराउने प्रतिवद्धता व्यक्त गरिन् । साथै डाटा सेवामा विशेष ध्यान केन्द्रीत गर्ने, योजना आयोजनाहरु समयमा सम्पन्न गर्ने तथा मर्मत सम्भारको कार्य स्तरीय बनाउन लागि पर्ने समेत उनले बताइन् ।

राजभण्डारीले आगामी दिनमा परिवर्तित संगठनात्मक संरचनालाई सबल बनाउँदै कम्पनीको विकासमा लाग्नुपर्ने, विकसित कार्य संस्कार, अझ राम्रो आपसी सम्बन्ध र समन्वय गर्नुपर्ने आवश्यकता रहेको बताइन् । साथै नेपाल टेलिकमको प्रबन्ध निर्देशक जस्तो उच्च पदमा आपूmलाई नियुक्त गरेकोमा नेपाल सरकार र सम्बन्धित सवैप्रति आभार प्रकट गरिन् ।

सो अवसरमा बरिष्ठ नायव प्रबन्ध निर्देशक सूर्यक्त पोखरेल र मानव संसाधन व्यवस्थापन प्रमुख रविन्द्र झाले स्वागत गर्दै राजभण्डारीको नेतृत्वमा कम्पनीलाई अघि बढाउन निरन्तर साथ सहयोग रहने बताए । कार्यक्रममा कम्पनीका प्रमुख व्यावसायिक अधिकृत, नायव प्रबन्ध निर्देशक, निर्देशकहरु, प्रबन्धकहरु, अन्य बरिष्ठ अधिकृतहरु, कम्पनीमा आवद्ध कर्मचारी युनियनका पदाधिकारीहरुलगायत कम्पनीका कर्मचारीहरुको उपस्थिति थियो ।

नवनियुक्त प्रबन्ध निर्देशक राजभण्डारीले भारतको चण्डिगढस्थित पञ्जाव इञ्जिनियरिङ कलेजबाट सन् १९८५ मा इलेक्ट्रोनिक्स तथा इलेक्ट्रिकल कम्युनिकेसन इञ्जिनियरिङमा स्नातक गरेकी थिइन् । थाइल्यान्डको बैंककस्थित एसियन इन्स्टिच्युट अफ टेक्नोलोजीबाट सन् २००१ मा एमविए गर्नु भएको छ । नवनियुक्त प्रबन्ध निर्देशक राजभण्डारी २०४२ असोज १ गते इञ्जिनियरको रुपमा तत्कालिन नेपाल दूरसञ्चार संस्थानमा प्रवेश गरेकी हुन् ।

कम्पनीका विभिन्न निर्देशनालय तथा विभागमा प्रमुख भई कार्य गर्नु भएका राजभण्डारी ०६३ कात्तिक १९ मा प्रबन्धक पदमा बढुवा हुनु भएको थियो । त्यसैगरी २०७१ असारमा नायब प्रबन्ध निर्देशकको पदमा पदोन्नति भएकी हुन् ।

उनी २०७२ माघ २९ देखि प्रमुख प्राविधिक अधिकृतको रुपमा कार्यरत थिइन् । उनीसँग फिक्स्ड नेटवर्क प्लानिङ र प्रोजेक्ट तथा जीएसएम प्लानिङ, प्रोजेक्ट र कोर अपरेसनसम्बन्धी कामको लामो अनुभव छ । त्यस्तै योजना, परियोजना सञ्चालन, मर्मत सम्भार, स्पेसिफिकेसन तयारी, अनुगमन तथा मूल्यांकन जस्ता क्षेत्रमा विशेष दख्खल छ । नेपाल इञ्जिनियर्स एसोसिएसनले २०७३ साउनमा ‘आउटस्ट्यान्डिङ वुमन इञ्जिनियर अफ द इयर’ बाट सम्मानित गरेको थियो ।