काठमाडौं । एनसेलको मुख्य लगानीकर्ता कम्पनी अजियाटा बर्हाड ग्रुपले नेपालबाट फाईदै नभएपछि लगानीबाट हात झिक्नुपर्ने अवस्था आएको बताएको छ । शुक्रबार एक विज्ञप्ति जारी गर्दै कम्पनीले पछिल्लो ७ बर्षमा आम्दानीको ठुलो हिस्सा करमै भुक्तानी गरेको र लाभांसको रुपमा न्युन पैसा मात्रै पाएका कारण नेपाल छोड्नुपर्ने बाध्यकारी अवस्था निम्तिएकाे बताएको छ ।
कम्पनीका अनुसार अजियाटाले एनसेलमा रहेको ८० प्रतिशत सेयर सन २०१६ मा खरिद गरेको थियो । त्यसयता कम्पनीले नेपाल सरकारलाई करवापतको मात्रै २ खर्ब ८३ अर्ब रुपैयाँ भुक्तानी गरेको दावी गरेको छ । तर, लाभांसवापत अजियाटा समुहमा जम्मा ६२ अर्ब ७४ करोड रुपैयाँ मात्रै योगदान पुगेको कम्पनीले जारी गरेको विज्ञप्तिमा उल्लेख छ ।
कम्पनीद्वारा जारी विज्ञप्तिका अनुसार यसरी नेपालको कम्पनीमा लगानी गरेर आश गरेको भन्दा न्युन फाईदा भएकै कारण एनसेलबाट हात झिक्नुपरेको उल्लेख गरेको छ । अजियाटा ग्रुपका अध्यक्ष तान श्री सहरील रिजा रिजवानले अब एनसेलबाट हात झिकेसँगै अजियाटा ग्रुप थप मजबुत र आफ्नो रणनीतिमा अघि बढ्न सक्ने बताए ।
यस्तै अजियाटा ग्रुपका कार्यकारी अधिकृत तथा प्रवन्ध निर्देश विवेक सुदले ७ बर्ष लामो कठोर मेहनतका बावजुद पनि सरकारी नीति र असहजीकृत वातावरणका कारण बाहिरिनुपरेको बताए । नेपालको सरकारी नीतिले विदेशी लगानीका कम्पनीहरु २५ बर्षपछि पुर्ण रुपमा सरकारको स्वामित्वमा जाने व्यवस्था छ । सोही व्यवस्था र उच्च करका कारण आफुहरु बाहिरिनुपरेको उनको भनाई छ ।
खासगरी दूरसंचार ऐन २०५३ मा नेपालमा संचालित दूरसंचार कम्पनीमा बहुमत सेयर विदेशी कम्पनीको भए संचालनको २५ बर्षपछि त्यसको स्वामित्व सरकारमा जाने उल्लेख छ ।
यसैका कारण नेपालबाट बाहिरिने घोषणा गरेको अजियाटाले एनसेलमा भएको आफ्नो हिस्साको ८० प्रतिशत सेयर नेपाली साझेदार सतिशलाल आचार्यको कम्पनी स्पेक्ट्रलाईट युकेलाई बेचिसकेको छ ।
