काठमाडौं । सरकारले चालु आर्थिक वर्षको बजेटको आकार १ खर्ब ३० अर्बले घटाएको छ । अर्थमन्त्रालयले चालु आर्थिक वर्षको बजेटको अर्धबार्षिक समीक्षा सार्वजनिक गर्दै १३ खर्ब ४४ अर्ब ६८ करोड रुपैयाँ खर्च हुने संशोधित अनुमान सार्वजनिक गरेको हो । चालु आर्थिक वर्षका लागि सरकारले १४ खर्ब ७४ अर्ब ६४ करोडको बजेट विनियोजन गरेको थियो ।
यसमा प्रतिनिधि सभा निर्वाचनको खर्च, कोभिड विरुद्धको खोप खर्च, अनिवार्य दायित्व तथा पूर्व सहमति दिएका ठूला आयोजनाहरुको दायित्वलाई मध्यनजगर गरी राखिएको अर्थमन्त्री विष्णु पौडेलले बताएका छन् ।
उनका अनुसार चालु खर्च ९ खर्ब ४८ अर्ब ९४ करोडबाट घटाएर ९ खर्ब १४ अर्ब ७८ करोडमा झारिएको छ । यस्तै पूँजीगत खर्च ३ खर्ब ५२ अर्ब ९१ करोडबाट घटाएर २ खर्ब ८३ अर्ब ४ करोडमा झारिएको छ । यसैगरी वित्तीय व्यवस्थापन तर्फ १ खर्ब ७२ अर्ब ८९ करोडको बजेटको आकार घटाएर १ खर्ब ४६ अर्ब ८६ करोडमा सिमित हुने अनुमान अर्थमन्त्रालयले गरेको छ ।
यो खर्च व्यवस्थापनका लागि सरकारले राजश्व र आन्तरिक ऋणबाट १० खर्ब ७४ अर्ब ६८ करोड र वैदेशिक अनुदानबाट ३५ अर्ब र वैदेशिक ऋणबाट २ खर्ब ३५ अर्ब जुटाउने संशोधित अनुमान रहेको मन्त्री पौडेलले जानकारी दिए ।
