काठमाडौं । गत आर्थिक बर्ष नेपालले सबैभन्दा बढी निर्यात गर्ने बस्तुमध्ये पाम आयलको निर्यात ७७ प्रतिशतले वृद्धि भएको छ । पछिल्लो समय नेपालको निर्यात व्यापारको सबैभन्दा धेरै हिस्सा ओगटेको पाम आयलको निर्यातले पछिल्लो २ बर्ष लगातार पहिलो स्थान छोडेको छैन ।
नेपाल राष्ट्र बैंकका अनुसार नेपालले निर्यात गर्ने प्रमुख बस्तुहरुमा कार्पेट, धागो, जुटका सामान, अलैँची, जुस क्रमशः दोश्रो, तेस्रो, चौथो, पाँचौ, छैठौं र सातौ धेरै निर्यात हुने बस्तुमा परेका छन् । यीसँगै गत बर्ष टेक्सटाईल, तयारी पोशाक, पश्मिना र पीना पनि क्रमशः आठौं, नवौं र दशौं धेरै निर्यात हुने बस्तुमा परेका छन् ।
नेपालले गत बर्षभरी ९७ अर्ब ७० करोड रुपैयाँ बराबरको निर्यातको व्यापार गरेकोमा सबैभन्दा बढी हिस्सा पाम आयलको रहेको छ । पाम आयलले गत बर्ष नेपालको निर्यात व्यापारमा १८ दशमलव ७ प्रतिशतको योगदान गरेको छ । यस्तै निर्यात योगदानको दोस्रो स्थानमा रहेको उनको कार्पेटले भने ६ दशमलव ३ प्रतिशतको हिस्सा ओगटेको छ । जुन गत बर्ष ६ अर्ब १५ करोड रुपैयाँबराबरको निर्यात भएको छ ।
अघिल्लो बर्षको तुलनामा गत बर्ष नेपालबाट ७७ दशमलव ३ प्रतिशत बढी पाम आयलको निर्यात भएको छ । अघिल्लो बर्षभरी १० अर्ब ३३ करोड रुपैयाँ बराबरको पाम आयलको निर्यात भएकोमा गत बर्ष भने १८ अर्ब ३१ करोड रुपैयाँ बराबरको पाम आयल निर्यात भएको छ । नेपालले विभिन्न देशबाट कच्चा पाम आयल ल्याएर भारतलगायत देशहरुमा रिफाईन गरी बेच्ने गरेको छ । पाम आयलका लागि भारत सबैभन्दा ठूलो बजार पनि हो ।
राष्ट्र बैंकका अनुसार गत बर्ष पाम आयलको निर्यातमा ठुलो वृद्धि भएपनि निर्यात हिस्सा बढी रहेका अन्य बस्तुहरुको निर्यात वृद्धि भने घटेको छ । भारतलगायतका देशहरुले कुखुरालगायतका घरपालुवा जनावरको दाना बनाउनका लागि पिनाको आयात गर्ने गरेका छन् । जुन गतबर्षभरी नेपालबाट १ अर्ब ५६ करोड रुपैयाँ बराबरको निर्यात भएको छ ।
