काठमाडौं । यसअघि भविष्यवाणी गरिएको सुनको मूल्य २ हजार डलर प्रतिऔंस गत हप्ता पुग्यो । र पुनः सुनको मूल्य ओरालो लाग्दै १ हजार ८ सय ७४ डलर प्रतिऔंस सम्म पुग्यो । यसरी सुनको मूल्यमा भईरहेको उत्तारचढावका आधारमा आगामी सेप्टेम्बरको अन्त्यसम्म सुनको मूल्य घट्दै प्रतिऔंस १ हजार ६ सय ६० डलर पुग्ने अनुमान गरिएको छ । जसलाई सुन खरिदका लागि स्वर्ण समयसमेत मानिएको छ ।
सुनलगायत अन्य बहुमूल्य धातुहरुको मूल्य लगातार रुपमा घटबढ भईरहन्छ । जसको उदाहरण हो पछिल्लो समयको मूल्य । एकैचोटी बढेर उचाईमा पुगेको सुनको मूल्य पुनः ओरालो लाग्न सुरु गरेको छ । यसैगरी सुनको ओरालो लाग्ने क्रम आगामी ५ देखि ६ हप्तासम्म चल्ने अनुमान गरिएको छ ।
नेपालकै अवस्था हेर्ने हो भने पछिल्लो ६ महिनामा मात्रै सुनको मूल्य ४० हजार बढीले वृद्धि भएको थियो ।
आईतबार भने नेपाली बजारमा सुनको मूल्य ९८ हजार ४ सय रुपैयाँ प्रतितोला पुगेको छ । लगातार बढेर प्रतितोला १ लाख ३ हजार ५ सय रुपैयाँ पुगेको थियो । तर अन्तररष्ट्रिय बजारमा सुनको मूल्यमा गिरावट आएसँगै नेपालमा पनि यसको प्रत्यक्ष असर परेको देखिन्छ । नेपाल सुनचाँदी व्यवसायी महासंघका अनुसार आईतबार सुनको मूल्यमा शुक्रबारको तुलनामा प्रतितोला २ सय रुपैयाँको गिरावट आएको छ ।
यस्तै आईतबार चाँदीको मूल्य १ हजार ३ सय २५ रुपैयाँ प्रतितोला पुगेको छ । नेपालमा करिव २ हप्ताअघि सुनको मूल्य प्रतितोला १ लाख नाघ्ने प्रक्षेपण गरिएको थियो । सोहीअनुसार मूल्यमा वृद्धि पनि भयो । तर अन्तरराष्ट्रिय बजारमा सुनको मूल्यमा गिरावट आउने प्रक्षेपण गरेसँगै नेपालमा पनि यसको मूल्यमा गिरावट आउने अनुमान गरिएको छ । – अन्तराष्ट्रिय मिडिया तथा विश्लेषकका धारणामा आधारित
