काठमाडौं । नेपालमा विद्युतिय सार्वजनिक यातायात सञ्चालन गरिरहेको सुन्दर यातायातले थप बसहरु आयातका लागि कोलकाताबाट रसुवागढी लोकेसन सिफ्ट गरेको छ ।
कोरोना भाइरस (कोभिड–१९) पछि जारी लकडाउनका कारण भारतको कोलकाता नाकाबाट बस आयातमा चुनौती आएको भन्दै कम्पनीले आगामी महिना भित्र्याउने तयारी गरेका १२ वटा बसका लागि लोकेसन सिफ्ट गरेको हो । यी बसको मूल्य करीब साढे २२ करोड पर्नेछ ।
हालसम्म भारतको कोलकातबाट गाडीहरु भित्र्याउँदै आएको कम्पनीले अब ल्याउने गाडीहरु भने उत्तरी नाकाबाट भित्र्याउने तयारी गरेको हो । कम्पनीले हालसम्म कोलकत्ता नाकाबाट १३ ओटा विद्युतीय बसहरु भित्र्याईसकेको छ ।
गत आर्थिक बर्षभित्रै नेपालमा २५ ओटा विद्युतीय बसहरु भित्र्याउने घोषणा गरेको कम्पनीले लामोसमयको लकडाउनका कारण बाँकी बसहरु भित्र्याउन नसकेको कम्पनीका अध्यक्ष भेषबहादुर थापाले जानकारी दिए । उनका अनुसार लकडाउनका कारण आउन नसकेका बसहरु तथा अन्य एसेम्बल गर्न मिल्ने उपकरणहरु पनि अब रसुवागढी नाकाबाट भित्रिनेछन् ।
यसअघि कम्पनीका गाडीहरुका लागि चीनतर्फको बाटोमा मोड नपुग्ने र नेपालतर्फ पनि बाटोको अवस्था त्यस्तै रहेकाले हालसम्म विद्युतीय बसहरु ल्याउन अप्ठ्यारो भईरहेको थियो ।
तर, कम्पनीले चीनतर्फ तथा नेपालतर्फका अधिकारीहरुसँगको समन्वयपछि उक्त सडकमा पर्ने अफठ्यारो बाटोलाई बनाउने पहल गरेको थियो । चीनतर्फ पहिरो पन्छाउन र बाटो सहजीकरणपछि कम्पनीले आफ्ना गाडी ल्याउने लोकेसन सिफ्ट गरेको हो ।
यसअघि कम्पनीले कोलकात्ता नाकाबाट गाडी ल्याउँदा धेरै चुनौती खेपेको अध्यक्ष भेषबहादुर थापा बताउँछन् । कोलकात्ता नाकाबाट गाडी ल्याउँदा ब्याट्री ड्यामेज गरिदिने, गाडी नै काम नलाग्ने बनाउनेलगायतका चुनौतीहरु थिए । अर्थात कम्पनी त्यहाँका स्थानीयहरुसँगै डराउनुपर्ने अवस्था थियो ।
त्यसका लागि कम्पनीले काठमाडौंबाट एउटा गाडी ल्याउनका लागि २ जना थप मान्छे पठाउनुपर्ने अवस्था थियो । तर, अब उत्तरी नाका सहजीकरणको प्रक्रिया सुरु भएसँगै सबै समस्या र चुनौतीको अन्त्य भएको अध्यक्ष थापाले बिजखबरलाई जानकारी दिए ।
कम्पनीले चीनको विद्युतिय बस उत्पादक कम्पनी बीएके प्रणालीबाट गाडी ल्यााउने गरेको छ । अब आउने १२ विद्युतीय बसहरु आगामी महिनासम्म ल्याउने योजना रहेको तर, चीनमा अझै कोरोना महामारीका कारण कडाई गरियो भने त्यो समयावधि थपिनेसमेत सक्ने थापले बताए ।
सुन्दर यातायातले चिनियाँ कम्पनीबाट ल्याउने ४५ सिटे विद्युतीय बसको मूल्य १ करोड ८७ लाख रुपैयाँ पर्छ । बसमा सिसीटीभी क्यामरा, डिजिटल टिकेट सिस्टमलगायत जडान गरिएको छ ।
कम्पनीले लकडाउनअघि उपत्यकाको चक्रपथमा गुडाईरहेका बसहरु हाल रत्नपार्कदेखि सुर्यविनायकसम्म सञ्चालन गरिरहेको छ । कम्पनीले आफ्ना विद्युतीय बसहरु बुटवलमा पनि चलाउने तयारी गरेको छ ।
