दैनिक प्रशासन सञ्चालन गर्न पनि आर्थिक बर्ष सुरु भएको केहि महिनामै अधिकतम आन्तरिक ऋण उठाइसकेको र बजेट घाटा व्यहोर्नुपरेको नियतिमा नेपाली अर्थतन्त्र छ । संघीय संरचना कार्यान्वयनमा आइसकेपछि अर्थतन्त्र धान्न मुस्किल पर्ने विचार बाहिर आइरहेका छन् । नेपालको चुनौतीपूर्ण अर्थतन्त्रको विपरित सिङ्गापुर भने बजेट नै बढी(सरप्लस) भएपछि उक्त रकम आफ्ना नागरिकलाई बोनसको रुपमा वितरण गर्ने तयारीमा छ ।
सिङ्गापुरका अर्थमन्त्री हेङ स्वि किटले सोमबार संसदमा बजेट सार्वजनिक कार्यक्रममा यस्तो घोषणा गरेका हुुन् । उनले यो घोषणालाई ‘होङबाओ’ नाम दिएका छन् । सिङ्गापुरमा प्रचलित मन्दारिन भाषामा कुनै विशेष अवसरमा उपलब्ध गराइने आर्थिक उपहारलाई होङबाओ भनिन्छ ।
घोषणा अनुसार सिङ्गापुरका २१ ब्र्षभन्दा माथिका नागरिकले यस्तो बोनस प्राप्त गर्नेछन् । सिङ्गापुरका अर्थमन्त्रीले करिब ७ खर्ब ६० अर्ब रुपैयाँले बजेट सरप्लस भएपछि बोनसको कार्यक्रम सार्वजनिक गरेका हुन् । नागरिकले बढीमा तीन सय सिङ्गापुर डलरसम्म बोनस प्राप्त गर्नेछन् । ‘सिङ्गापुरको विकासको उपलब्धी नागरिकलाई नै उपलब्ध गराउने सरकारको दीर्घकालीन प्रतिबद्धताको चित्र हो यो’ अर्थमन्त्री किटले भने ।
बोनस बापत सिङ्गापुर सरकारले ५३ अर्ब रुपियाँ खर्च गर्नेछ । बोनस नागरिकको आम्दानी अनुसार फरक हुनेछ । सन् २०१८ को अन्त्यसम्म २७ लाख नागरिकले यो प्राप्त गर्नेछन् ।
सरकारले आम्दानी अनुसार बोनसको वर्गिकरण पनि गरेको छ । नियम अनुसार २८ हजार सिङ्गापुर डलरभन्दा कम आम्दानी हुने नागरिकले तीन सय डलर, २८ हजारदेखि एक लाख डलरसम्म आम्दानी हुनेले दुई सय डलर र एकलाख डलरभन्दा बढी आम्दानी हुनेले १ सय डलर बोनस पाउनेछन् ।
सिङगापुरको सन् २०१७ को संसोधित बजेट अनुसार ९ अर्ब ६१ करोड डलर बजेट सरप्लसमा छ । यसरी बढी भएको बजेटको ५ अर्ब डलर सिङगापुरमा थप रेल लाइन विस्तारमा पनि लगानी गरिने अर्थमन्त्रीले जनाएका छन् । अर्को दुई अर्ब डलर जेष्ठ तथा फरक क्षमताका नागरिकको बिमा तथा सेवा सुविधाका लागि स्थापना गरिएको एल्डरसिल्ड र अन्य सेवा सुविधामा प्रयोग हुनेछ । – एजेन्सी
