काठमाडौं । सी जिनपिङ लगातार तेस्रो पटक चीनको राष्ट्रपति बनेका छन् । शुक्रबार उनले तेस्रो कार्यकाल असाधारण रुपमा सुरु गरेका छन् । उनी लगातार तीन कार्यकाल राष्ट्रपतिको पद सम्हाल्ने देशका पहिलो नेता हुन् ।
सन् २०१३ मा उनी पहिलो पटक देशको राष्ट्रपति बनेका थिए । यसपछि सन् २०१८ मा उनी दोस्रो पटक राष्ट्रपतिमा निर्वाचित भए । शुक्रबार, वार्षिक राष्ट्रिय जन कांग्रेसका प्रतिनिधिहरूले सीलाई केन्द्रीय सैन्य आयोगको अध्यक्षमा नियुक्त गरेको औपचारिक रूपमा घोषणा गरे ।
अब नयाँ प्रधानमन्त्रीको घोषणा हुने
अक्टोबर २०२२ मा भएको चिनियाँ कम्युनिष्ट पार्टीको २०औँ राष्ट्रिय महाधिवेशनमा सी जिनपिङले आफ्नो पार्टीमाथि आफ्नो नियन्त्रणलाई थप बलियो बनाएका थिए । यसैबीच उनले आफ्ना निकट र वफादारलाई पार्टीको शीर्ष पदमा नियुक्त गरेका छन् । अक्टोबरमा भएको सम्मेलनपछि चिनियाँ कम्युनिष्ट पार्टीले सरकारका विभिन्न पदहरूमा महत्वपूर्ण नियुक्ति गर्छ जसमा राष्ट्रपति र प्रधानमन्त्रीको नियुक्ति सबैभन्दा महत्त्वपूर्ण हुन्छ । शनिबार प्रतिनिधिहरूले चीनको नयाँ प्रधानमन्त्रीको नाम अनुमोदन गर्नेछन् ।
सोमबार संसदीय बैठकको अन्त्यमा जिनपिङले सम्बोधन गर्नेछन् । यसपछि प्रधानमन्त्रीको सम्बोधन हुनेछ । शुक्रबार प्रतिनिधिहरूले प्रदेश परिषद्को पुनर्संरचनाको प्रस्तावलाई पनि स्वीकृत गरेका छन् । यो चिनियाँ सरकारको शीर्ष कार्यकारी निकाय हो । यो साता मस्यौदा योजना सार्वजनिक भएको छ । यसबाट सत्तारुढ कम्युनिष्ट पार्टीले आगामी दिनमा सरकारको नियन्त्रण झनै बढाउने संकेत गरेको छ ।
जिनपिङ सबैभन्दा शक्तिशाली नेता बने
जिनपिङको पार्टीभित्रको कद पछिल्लो दशकमा तीव्र गतिमा बढेको छ । कम्युनिष्ट पार्टीका एक साधारण कार्यकर्ताबाट आज उनी विश्वकै शक्तिशाली राष्ट्रको राष्ट्रपति भएका छन् । धेरै दशकपछि चीनले माओपछि शक्तिशाली बनेको नेता पाएको छ । जिनपिङअघि जियाङ जेमिन र हु जिन्ताओले १० वर्षपछि आफ्नो कार्यालय छोड्नुपरेको थियो । सन् २०१८ मा जिनपिङले संविधान परिवर्तन गरेका थिए । यो परिवर्तनपछि उनको आजीवन शासनको बाटो पनि खुल्यो । अब उनी चीनको सबैभन्दा लामो समय सेवा गर्ने राष्ट्रपति बनेका छन् ।
देशले धेरै चुनौतिीहरू सामना गरिरहेको बेलामा सी चीनको सत्तामा विकल्पविहिन नेतृत्व बन्दै गएका छन् । चीनले मानव अधिकारदेखि व्यापार र प्रविधिसम्मका धेरै चुनौतीहरूको सामना गरिरहेको छ । पिपुल्स कंग्रेसका प्रतिनिधिहरुलाई सम्बोधन गर्ने क्रममा जिनपिङले अमेरिकाको आलोचना गरे । उनले अमेरिकाले चीनलाई नियन्त्रण, घेराबन्दी र दमन गर्ने नीति अपनाएको आरोप लगाए । उनले चीनले राष्ट्रिय तथा अन्तर्राष्ट्रिय स्तरमा धेरै चुनौती सामना गरिरहेकोले लड्न साहस जुटाउनुपर्ने बताए । अनुवाद गरिएको
