काठमाडौं । ट्रान्सपरेन्सी इन्टरनेसनलले सन् २०२० को भ्रष्टाचार अवधारणा सूचकांक (सिपिआइ) रिपोर्ट सार्वजनिक गरेको छ । रिपोर्टअनुसार सन् २०२० मा सबैभन्दा बलियो सुशासन भएको देशहरूमा डेनमार्क, न्यूजील्याण्ड, फिनल्याण्ड, सिंगापुर, स्वीडेन र स्वीजरल्याण्ड परेका छन् । १ सय अंकमा डेनमार्क र न्यूजील्याण्डले समान ८८ अंक पाएका छन् ।
त्यस्तै, फिनल्याण्ड, सिंगापुर, स्वीडेन र स्वीजरल्याण्डको समान ८५ अंक छ । सन् २०१९ मा न्यूजील्याण्ड, डेनमार्क, फिनल्याण्ड, स्वीजरल्याण्ड, सिंगापुर, स्वीडेन, नर्वे, नेदरल्याण्डस्, लक्जमबर्ग र जर्मनी सबैभन्दा कम भ्रष्टाचार हुने मुलुकमा थिए । गत वर्ष पाँचौ नम्बरमा रहेको सिंगापुर यो वर्ष चौथो नम्बरमा उक्लिएको छ ।
ट्रान्सपरेन्सीले सबैभन्दा धेरै भ्रष्टाचार हुने मुलुकको सूचिमा क्रमशः साउथ सुडान, सोमालिया, सिरिया, यमन र भेनेजुयला छन् । अघिल्लो वर्ष सोमालिया, साउथ सुडान, सिरिया, यमन र अफगानिस्तान सबैभन्दा धेरै भ्रष्टाचार हुने पाँच देशमा परेका थिए ।
नेपाल १ सय ८० देश मध्ये एक सय १७ औं स्थानमा परेको छ । सन् २०१९ मा नेपाल ३४ अंकसहित एक सय ११३ स्थानमा थियो । पछिल्लो वर्ष नेपालमा भ्रष्टाचार बढेको ट्रान्सपरेन्सीको रिपोर्टले देखाएको छ ।
छिमेकी देश भारत गत वर्ष ८० औं स्थानमा रहेकोमा यो वर्ष ८६ स्थानमा खस्केको छ । चीनले गत वर्ष भन्दा दुई स्थान सुधार गरी ७८ औं स्थानमा उक्लिएको छ । गत वर्ष चीन पनि ८० औं स्थानमा थियो ।
जर्मनीमा मुख्य कार्यालय रहेको ट्रान्सपरेन्सी इन्टरनेशनललेसन् १९९५ देखि यस्तो रिपोर्ट प्रकाशन गर्दै आएको छ । विश्व बैंक, वल्र्ड इकोनोमिक फोरम लगायतको रिपोर्टलाई आधार मानेर ट्रान्सपरेन्सीले यस्तो सूचकांक बनाउने गर्दछ ।
