काठमाडौं । नेपालमा ३ जनालाई बेलायतमा देखिएको नयाँ प्रजातिको कोरोना भाईरस संक्रमण भएको पुष्टि भएको छ । स्वास्थ्य तथा जनसंख्या मन्त्रालयले सोमबार एक सूचना जारी गर्दै बेलायतबाट आएका ३ जना नेपालीलाई उक्त नयाँ प्रकारको कोरोनाको भाईरस संक्रमण पुष्टि भएको जानकारी दिएको हो ।
केहिदिनअघि बेलायतबाट आएका ६ जनाको नमुना परिक्षण गर्दा ३ जनाको एस जेने नेगेटिभ आएको र सोहीअनुसार ३ जनाको परिक्षणका लागि हङकङ पठाईएको थियो । हङकङबाट हालै मन्त्रालयको ईमेलमा ३ जनालाई नयाँ प्रकारको कोरोना भाईरस संक्रमण पुष्टि भएको प्रतिवेदन पठाएको मन्त्रालयले जानकारी दिएको छ ।
मन्त्रालयका अनुसार नयाँ प्रकारको कोरोना संक्रमितमा २८ बर्षिय महिला, ६७ र ३२ बर्षिय पुरुष रहेका छन् । हाल संक्रमण देखिएकामध्ये २८ बर्षिय महिला र ३२ बर्षिय पुरुषको पीसीआर नेगेटिभ आईसकेपनि ६७ बर्षिय पुरुषमा भने पोजेटिभ पाईएको छ । तर उनलाई लक्षण भने कुनै देखिएको छैन । मन्त्रालयले नयाँ प्रकारको भाईरस नेपाल पनि भित्रिसकेको हुनाले सजगता अपनाउन आग्रह गरेको छ ।
मन्त्रालयले नेपालमा कोरोना भाईरस विरुद्धको भ्याक्सिन उपलब्ध नभएकाले भ्याक्सिन उपलब्ध हुँदासम्म सामाजिक दुरी, मास्कको प्रयोग, सेनिटाईजरको प्रयोगलगायतमा विशेष ध्यान पुर्याउन आग्रह गरेको हो ।
