जेनेभा । विश्व स्वास्थ्य संगठन (डब्लुएचओ) ले गरिब राष्ट्रहरूमा नयाँ बर्ष सन् २०२१ को सुरूदेखि नै कोरोनाविरूद्धको खोप पठाउन थालिने जनाएको छ । डब्लुएचओ र त्यसका साझेदारहरूले कोभ्याक्सलगायतका खोप शीघ्र उपलब्ध हुनसक्ने बताएका हुन् ।
उनीहरूले सबैलाई पुग्नेगरी बनाउने तयारी भइरहेको जनाएका छन् । विश्व समुदायका लागि झण्डै दुई अर्ब मात्रा खोप सुरक्षित गर्न लागिएको स्वास्थ्य निकायका अधिकारीहरूले जानकारी दिएका छन् । संगठनले जारी गरेको वक्तव्यमा लेखिएको छ, ‘सबै देशले कोरोनाविरूद्धको खोप किनेर लैजान सक्दैनन्, ती देशहरूमा पनि सन् २०२१ को सुरू देखि नै खोप पठाइने छ ।’
अध्यारो सुरुङ्मा पनि थोरै उज्यालो हुन्छ भने झैँ महामारीका बेला पनि गरिब मुलुकलाई कोरोनाविरूद्धको खोप उपलब्ध गराउने प्रयास भइरहेको डब्लुएचओका प्रमुख टेड्रोस अधानोम गेब्रेयससले जानकारी दिए ।
नेपाल पनि कोभ्याक्सअन्तरगत खोप प्राप्त गर्ने देशकहरुको सूचीमा रहेको छ । कोभ्याक्समार्फत आउने खोप कूल जनसंख्याको २० प्रतिशतलाई पुग्ने छ । स्वास्थ्य तथा जनसंख्या मन्त्रालयले नेपालमा कुल जनसंख्याको ७२ प्रतिशतलाई कोरोनाविरुद्धको खोप दिइने बताएको छ । जसमा बाँकी ५२ प्रतिशत खोप सरकार–सरकार (जिटुजी), सार्वजनिक खरिदमार्फत ल्याउने तयारी सरकारको रहेको छ । बीस प्रतिशत जनसंख्यालाई पुग्ने खोपमध्ये पहिलो चरणमा कोभ्याक्समार्फत तीन प्रतिशतलाई खोप ल्याइने मन्त्रालयले बताउँदै आएको छ ।
