काठमाडौं । नेपाल उद्योग वाणिज्य महासंघको आसन्न निर्वाचनका लागि वरिष्ठ उपाध्यक्षका उम्मेदवार किशोर प्रधानले उपाध्यक्ष तथा सदस्यहरु सहितको टीम घोषणा गरेसँगै विरोध सुरु भएको छ । प्रधान प्यानलले आज लतिपुरको भिमान्त होटलमा उम्मेदवारी दर्ताको घोषणा गरेसँगै कतिपय सदस्यहरुले आफुहरुसँगै कुनै सल्लाह नै नगरी आफ्नो नाम उल्लेख गरेको भन्दै विरोध जनाएका छन् ।

विशेषगरी जिल्ला नगरबाट उठ्ने सदस्यहरुले आफुसँग कुनै सल्लाह नै नगरी प्रधान प्यानलले आफ्नो नाम उम्मेदवारी दर्ताको लागि उद्घोष गरेको भन्दै विरोध जनाएका छन् । दार्चुला उद्योग वाणिज्य संघका अध्यक्ष मंगलसिंह ठगुन्नाले बिजखबरसँगको कुराकानीमा प्रधान प्यानलले विना कुनै सल्लाह वा सहमति वेगर आफ्नो नाम टीममा समावेश गरेको भन्दै विरोध जनाएका छन् । ‘म आफै दार्चुला उद्योग वाणिज्य संघको अध्यक्ष हुँ, म अहिले पनि दार्चुलामै छु,’ उनले भने, ‘मसँग कुनै सल्लाह नै गरी किशोर प्रधान प्यानलबाट जिल्ला नगर सदस्यमा कसरी मेरो नाम आयो म आफै अचम्मित छु यसमा मेरो विरोध छ ।’ साथै महासंघको आसन्न निर्वाचनमा सदस्य पदमा दार्चुलाबाट उम्मेदवार उठ्न वा नउठ्ने भन्ने विषयमा अहिलेसम्म कुनै टुङ्गो नलागेको समेत उनले जानकारी दिए ।

यसैगरी ताप्लेजुङ उद्योग वाणिज्य संघका अध्यक्ष तारानाथ घिमिरेले पनि प्रधान प्यानलले आफ्नो नाम समावेश गरेको भन्दै आपत्ति जनाएका छन् । ‘म अहिले पनि ताप्लेजुङ्मै छु कसरी भयो प्रधान प्यानलबाट मेरो उम्मेदवारी दर्ता ?,’ बिजखबरसँग उनले भने, ‘म आफै २÷३ दिन जिल्ला नगरको तर्फबाट सदस्य पदमा उम्मेदवारी दर्ता गराउन काठमाडौं आउँदैछु तसर्थ प्रधान प्यानलबाट मेरो उम्मेदवारी दर्ता भन्दै नाम आउनु आपत्तिजन छ ।’ साथै हालसम्म उम्मेदवारी दर्ताका लागि प्रधान प्यानलले आफुसँग कुनै सल्लाह नै नगरेको समेत उनको भनाई थियो ।

यसैगरी सुनसरी उद्योग वाणिज्य संघका अध्यक्ष अशोक ताम्राकारले पनि किशोर प्रधान प्यानलले आफ्नो नाम राखेको भन्दै विरोध जनाएका छन् । ‘म चन्द्रप्रसाद ढकाललको प्यानलबाट उम्मेदवारी दर्ता गराउनका लागि बुधबार काठमाडौं आउँदैछु,’ बिजखबरसँग उनले भने, ‘कोसँग सल्लाह गरेर के आधारमा प्रधान प्यानलमा मेरो नाम राखियो म आफैलाई थाहा छै्न ।’

यसैगरी प्रधान प्यानलमा नाम राखिएको अन्य जिल्ला नगरका सदस्यहरुले पनि प्रधान प्यानलबाट आफ्नो नाम राखेको भन्दै विरोध जनाएका छन् । कतिपय सदस्यले लिखित रुपमै प्रधान प्यानलमा आफुहरु नरहेको जनाकारी दिन लागेको समेत सम्बद्ध स्रोतको दावी थियो ।

साथै आफ्नो टीम नै नपुग्ने भएपछि प्रधान प्यानलले जिल्ला नगरबाट धेरैजसो सदस्यको आफुखुशी नाम राखिदिएको समेत उक्त स्रोतको आरोप थियो ।