काठमाडौं । प्याकेटमा राखेर बजारमा विक्री हुने खाद्यबस्तुको उपभोग्य अवधि लेखिएका अक्षर हातैले मेटिने गरेको पाईएको छ । मंगलबार बिहान कालीमाटी क्षेत्रका खाद्य स्टोरहरुमा गरिएको अनुगमनका क्रममा १ दर्जन बढी प्रकारका खाद्य बस्तुमा यस्तो समस्या देखिएको हो ।
काठमाडौं महानगरपालिकाकाबाट खटिएको अनुगमन टोली कालीमाटीबाट बल्खुतर्फ लाग्दा प्रहरी चौकी नजिकै शिवज्योती पतञ्जली आयुर्वेद सेवा केन्द्र छ । केन्द्रमा निम्बसले मार्केटिङ् गरेको व्यञ्जन व्राण्डका सामान थिए ।
तीमध्ये पोलिस नगरिएको लेखिएका १ केजी तौलका ९ वटा कालो दालका प्याकेट र ९ प्याकेट नै पापड थियो । ती सबैमा लेखिएको मिति हातले सजिलै मेटियो । यी सामानसँगै लेवल नराखिएको जौको सातु १० प्याकेट र चिप्स ३१ प्याकेट उक्त टोलीले बरामद गरेको छ ।
समस्या शिवज्योतीमा मात्र होइन । त्यसै क्षेत्रको आयुषा खाद्य स्टोरले बेचेको टमाटो ससमा पनि उपभोग्य मिति मेटेर फेरि लेखिएको जस्तो भेटियो । बट्टा कुच्चिएका र पुराना थिए । अनुगमन टोलीले १ बट्टा नमूना परीक्षणका लागि लियो भने १३ वट्टा बिक्रीका लागि रोक लगायो ।
त्यस क्षेत्रमा खुल्ला बोरामा हालेर खाद्य बस्तु बेच्न राख्ने गरिएको छ । कसैले प्याकेजिङ् गर्ने गरेका छन् तर खाद्य अनुज्ञा पत्र लिएका छैनन् । सामान कसले पठायो ? उनीहरुले बिल किन दिएनन् ?, सामान बिग्रिए कसलाई फिर्ता गर्नुहुन्छलगायतका प्रस्न सोद्धा उत्तर नआएको टोलीका एक सदस्यले जानकारी दिए ।
