काठमाडौं । भारत सरकारले भूकम्पपछिको पुनर्निर्माणको लागि नेपाललाई एक अर्ब ५४ करोड रुपैयाँ उपलब्ध गराएको छ। काठमाडौंस्थित भारतीय राजदूतावासका नियोग उपप्रमुख नामग्य खम्पाले उक्त सहयोग रकम बराबरको चेक अर्थ मन्त्रालयका सचिव शिशिर कुमार ढुङ्गानालाई हस्तान्तरण गरेकी हुन्।
मंगलबार भारतीय राजदूतावासले उक्त सहयोग रकमको चेक हस्तान्तरण गरेको बिहीबार विज्ञप्तिमार्फत् जानकारी गराएको छ । आवास परियोजना अन्तर्गत भारत सरकारले १५० मिलियन अमेरिकी डलर अनुदान सहयोग उपलब्ध गराउने प्रतिबद्धता गरेको थियो ।
यसका लागि यसअघि नै ७२ मिलियन अमेरिकी डलर रकम उपलब्ध गराइसकिएको छ। गोरखा र नुवाकोट जिल्लामा ५० हजार निजी आवास पुनर्निर्माण गर्ने प्रतिबद्धता गरेको भारत सरकारले यस अन्तर्गत अहिलेसम्म ९२ प्रतिशत घरधुरीको पुनर्निर्माण भइसकेको विज्ञप्तिमा जनाएको छ।
त्यस्तै ७० वटा विद्यालय र एक पुस्तकालयको पुनर्निर्माणका लागि पनि भारत सरकारले ५० मिलियन अमेरिकी डलर अनुदान सहायता गर्ने प्रतिबद्धता गरेको छ।
यस अन्तर्गत पहिलो किस्ता ४.२ मिलियन अमेरिकी डलर बराबरको रकम नेपाल सरकारलाई उपलब्ध गराइसकेको छ।
