काठमाडौं । अवैध रुपमा भित्र्याइएको १५ किलो सुन बरामद भएको छ । महानगरीय प्रहरी परिसर काठमाडौंको एक टोलीले उक्त सुन बरामद गरेको हो ।
प्रहरीका अनुसार विशेष सूचनाको आधारमा प्रहरीले सुन तस्करलाई फलो गर्दै जाँदा तस्करको समूह सुनसहितको झोला फालेर भागेको हो । सो क्रममा प्रहरीले झोलामा २ थान हतियार समेत फेला पारेको छ ।
कारोबारीले फालेको झोला सर्च गर्दा १५ किलो सुन र दुईथान हतियार फेला परेको महानगरीय प्रहरी परिसरका एक अधिकृतले जानकारी दिए । सुन बरामदबारे आजै पत्रकार सम्मेलन गरेर जानकारी गराइने काठमाडौं परिसरले जनाएको छ ।
सुन बोक्ने गाडीको नम्बर पहिचान भएको तर मानिस पक्राउ पर्न नसकेको बताइएको छ । पहिचान भएको गाडी र मानिस खोज्न प्रहरी परिचालन गरिएको छ ।
आजको मूल्यअनुसार बरामद सुनको मूल्य १२ करोड ६३ लाख बराबरको रहेको छ । यसबारे थप विवरण आउन बाँकी रहेको छ ।
