काठमाडौं । गृहमन्त्रालयले मास्क नलगाई हिँड्नेलाई कारबाही गर्न सम्बन्धित निकायलाई निर्देशन दिएको छ ।
आइतबार गृहले ७७ वटै जिल्लाका प्रमुख जिल्ला अधिकारी र प्रहरी प्रधान कार्यालयलाई परिपत्र गर्दै मास्क नलगाई बाहिर निस्किनेलाई कडा कारबाही गर्न निर्देशन दिएको हो ।
लकडाउन खुलेपछि भीडभाड बढेको र मानिसहरुले मास्क नलगाई हिँड्ने गरेको गुनासो आएपछि गृहले निर्मम बन्न निर्देशन दिएको हो । मन्त्रायलका सह–प्रवक्ता उमाकान्त अधिकारीले मास्क नलगाई हिँड्नेलाई पक्राउ गर्न नर्देशन दिएको जानकारी दिए ।
‘हामीले ७७ वटै जिल्ला प्रशासन कार्यालयलाई मास्क नलगाई हिँड्नेलाई कारबाही गर्न निर्देशन दिएका छौं । अटेर गर्नेलाई पक्राउ गरेर संक्रामक रोग नियन्त्रण ऐन अन्तरगत कारबाही हुन्छ’, उनले भने ।
