काठमाडौं। नेपालमा कोरोना संक्रमितहरुमा जटिल खालको समस्या नदेखिइरहेका बेला विश्व स्वास्थ्य संगठन (डब्ल्यूएचओ) ले संक्रमण जोखिमविरुद्ध लडिरहेकाहरुलाई काम उपयोगी सूचना जारी गरेको छ ।
कोरोना भाइरस ‘कोभिड १९’ को संक्रमणपछि शुरुमै बिरामी पर्नेहरु बढी संक्रामक हुने डब्लूएचओले जानकारी गराएको छ । अनुसन्धानमा संक्रमणपछि शुरुमा बिरामी पर्नेहरुबाट धेरै व्यक्तिमा कोरोना सर्नसक्ने खतरा भएको डब्लूएचओले मंगलबार बताएको हो ।
डब्लूएचओकी महामारीविज्ञ मारिया भान करकोभ भन्छिन्, ‘संक्रमणपछि शुरुवातमै बिरामी पर्ने र कोरोनाको लक्षण देखिनेहरुले धेरै भाइरस बोकेका हुन्छन् जसले अन्यमा बढी कोरोना सार्ने सम्भावना हुन्छ ।’
बिरामी पर्नेहरुबाट सर्ने कोरोना नियन्त्रण गर्न गाह्रो हुने पनि डब्लूएचओले जनाएको छ । यद्यपी मानिसहरुमा कोरोना परीक्षण गरिरहे र व्यक्ति–व्यक्तिबीचको दूरीको नियम पालना गरे कोरोना भाइरसबाट जोगिन सकिने जनाइएको छ ।
स्यानिटाइजर लगाउने, हात धुने र भीडमा नगएमा पनि कोरोनाबाट बच्न सकिने डब्लूएचओले जनाएको छ । एजेन्सी
