काठमाडौं । विश्वमा कोरोना भाईरस संक्रमितको संख्या ७६ लाख नजिक पुगेको छ । तथ्याङ्क अनुसार शुक्रबार बिहानसम्ममा ७५ लाख ९६ हजार ९८७ जना संक्रमित भेटिएका छन ।
कोरोनाकै कारण ज्यान गुमाउनेको संख्या ४ लाख २३ हजार ८४४ जना पुगेको छ भने उपचार पछि निको भएर घर फर्कनेको संख्या ३८ लाख ४१ हजार ४९३ जना पुगेको छ । पछिल्लो २४ घण्टामा मात्रै थप १३ हजार ७९ जना नयाँ संक्रमित थपिएका छन भने मृत्यु हुनेको थप संख्या ७५८ जना रहेको छ ।
पछिल्लो २४ घण्टामा सबै भन्दा बढी संक्रमित हुने देशहरुमा मेक्सीको र पाकिस्तान रहेका छन । मेक्सीकोमा नयाँ संक्रमित मात्रै ४ हजार ७९० जना थप भएका छन भने पाकिस्तानमा ६ हजार ३९७ जना थपिएका छन । त्यस्तै मृत्युहुनेहरुमा पनि मेक्सीको, पाकिस्तान, बोलिभिया, ग्वाटेमाला, दक्षिण कोरियालगायतका रहेका छन ।
हालसम्म सबै भन्दा बढी प्रभावित भएको अमेरिकामा संक्रमितको संख्या मात्रै २० लाख ८९ हजार ७०१ जना पुगेको छ भने मृत्यु हुनेको संख्या १ लाख १६ हजार ३४ जना पुगेको छ । त्यस्तै अमेरिका पछि दोस्रोमा रहेको ब्राजिलमा ८ लाख ५ हजार ६४९, रसियामा ५ लाख २ हजार ४३६ जना र नेपालको छिमेकी देश भारत २ लाख ९८ हजार २८३ संक्रमित सहित चौथो नम्बरमा रहेका छन ।
