काठमाडौं । केही समययता चुनावी विषयलाई लिएर विवादमा तानिएको नेपाल उद्योग वाणिज्य महासंघ थप विवादमा फसेको छ ।
महासंघका अध्यक्ष भवानी राणाले बैंठकमा छलफल नै नभएको विषयलाई लिएर महासंघका पूर्व अध्यक्ष तथा विशिष्ट सदस्य चण्डीराज ढकाल विरुद्ध खेद प्रस्ताव पारित गरेपछि थप विवाद चुलिएको हो ।
महासंघल अध्यक्ष राणाले यही जेठ २३ गते भएको पदाधिकारी बैंठकले पूर्व अध्यक्ष तथा विशिष्ट सदस्य ढकाल विरुद्ध खेद प्रस्ताव पारित गरेको भन्ने समाचार आएपछि महासंघका उपाध्यक्षद्वय चन्द्रप्रसाद ढकाल र उमेशलाल श्रेष्ठ तथा कोषाध्यक्ष निरक केसीले गम्भिर ध्यानाकर्षण भएको बताएका छन् ।
पदाधिकारी बैठकको एजेन्डामा नै नरहेको उक्त विषयमा बैठकले सर्वसम्मतरुपमा खेद प्रस्ताव पारित गरेको भन्ने समाचारले महासंघको गरिमा र प्रतिष्ठामा आँच पुर्याउने र महासंघलाई नै झन कमजोर बनाएको महशुस भएको उनीहरुले बताएका छन् ।
त्यस्तै उनीहरुले यस्ता गम्भिर विषयहरुमा छलफल गर्दा पदाधिकारी, सचिवालय तथा कार्यसमितिको एजेण्डामा ल्याउनुपर्ने र सबैको सहमतीमा मात्र अगाडि बढाउनुपर्ने हुनाले बैठकमा प्रयाप्त छलफल गरेर मात्र अगाडि बढ्न समेत अध्यक्ष राणालाई आग्रह गरेका छन् ।
अध्यक्ष राणाले सिमिति व्यक्तिहरुको कोटरीमा बसेर सोही अनुरुप स्वार्थ बाझिनेगरी निर्णय गर्न थालेपछि महासंघका बहुमत सदस्यहरुले त्यसको विरोध गर्न थालेका छन् । महासंघ इतिहासमै अध्यक्ष राणाले महासंघलाई कमजोर बनाउने गरी आफ्ना स्वार्थ अनुरुपका निर्णयहरु गर्दा महासंघको साख समेत गुमेको महासंघ संबद्ध सदस्यहरुले बताएका छन् ।
