काठमाडौँ । विश्वभर कोरोना भाइरस (कोभिड–१९)का कारण हालसम्म ४ लाखभन्दा बढीले ज्यान गुमाएका छन् । वल्र्डोमिटरका अनुसार हालसम्म विश्वभर ४ लाख ९ हजार १७८ जनाको ज्यान गइसकेको छ । त्यस्तै संक्रमितको संख्या ६९ लाख ७० हजारभन्दा बढी रहेको छ ।
पछिल्लो समय अमेरिका, ब्राजिल भारत लगायत लेटिन अमेरिकी देशहरुमा कोरोना तीब्र रुपमा फैलिएको छ । निको भएर फर्किनेको संख्या ३४ लाख ११ हजारभन्दा बढी रहेको छ ।
३१ लाख संक्रमितको अवस्था माइल्ड प्रकृतिको रहेको छ । ५३ हजारभन्दा बढी संक्रमितको अवस्था गम्भीर रहेको छ । त्यस्तै विश्व स्वास्थ्य संगठन डब्ल्यूएचओले मास्क लगाउनेबारे नयाँ दिशानिर्देश जारी गरेको छ । यसअघि स्वस्थ व्यक्तिले मास्क लगाउन नपर्ने बताएको डब्लुएचओले अहिले भने सामाजिक दुरी कायम गर्न सम्भव नहुने स्थानहरुमा मास्क लगाउन भनेको हो ।
सार्वजनिक यातायात, बजार, शिविर जस्ता स्थानमा जाँदा कम्तिमा घरमै बनाइएको कपडाको मास्क भए पनि लगाउन डब्लुएचओले सल्लाह दिएको छ । यो नियम विश्वका धेरैजसो देशहरुले यसअघि नै लागु गरिसकेका छन् ।
डब्लुएचओको कोभिड–१९ सम्बन्धमा प्रमुख प्राविधिक विज्ञ डा मारिया भान केर्खोभले कपडाको मास्क मात्रै लगाउँदा पनि कोरोना भाइरस मिसिएका थुकका छिटाहरुबाट केही हदसम्म जोगिन सकिने उल्लेख गरेका छन् ।
