काठमाडौं । सरकारले मोडालिटीविनै लकडाउन जारी गरेको भन्दै स्वस्फूर्त रुपमा जनस्तरबाटै अवज्ञा सुरु भएसँगै सरकार अफ्ठयारेमा परेको छ । पहिलोपटक सरकारको निर्णयलाई चुनौती दिँदै जनताले आफ्ना व्यापार व्यवसाय आंशिक सुरु गरेका हुन् ।
अन्य दिनको तुलनामा बिहीबार काठमाडौं उपत्यकाका सडकमा सवारीसाधन धेरै नै गुडिरहेका छन् । सातदोबाटो, चाबहिल, कोटेश्वर, ग्वर्को, थापाथलीमा ट्राफिक जाम देखिएको थियो ।
जनस्तरबाटै लकडाउनको अवज्ञा भएपछि सरकार संकटमा परेको छ । लकडाउनलाई कसरी कडाई बनाउने भन्ने विषयमा छलफल गर्न बिहीबार काठमाडौं, ललितपुर र भक्तपुरका प्रमुख जिल्ला अधिकारीको बैठक बस्ने भएको छ ।
बैठकले राजधानीमा लकडाउनलाई कसरी प्रभावकारी बनाउने, नागरिकलाई कोरोना भाइरसको संक्रमण फैलिन नदिन कस्ता सुरक्षा सतर्कता अपनाउने भन्ने विषयमा छलफल गर्ने भएको छ ।
काठमाडौंका व्यापारी व्यवसायीले बिहानदेखि ११ बजेसम्म सबै बजार र पसल खोलेका छन् । काठमाडौं र ललितपुर महानगरले पनि बजार कसरी खुलाउने र कति समयसम्म खुलाउने भन्ने बारे नयाँ मोडालिटी बनाउने भएको छ ।
