काठमाडौं । अब मोटर बीमा गर्ने सार्वजनिक सवारीसाधनहरुले लकडाउन अवधिभरको बीमा शुल्क तिर्न नपर्ने भएको छ । बीमा समितिले मंगलबार एक सर्कुलर जारी गर्दै कोरोना बीमा गरेका गाडी मालिकहरुले लकडाउन अवधिभरको बीमा शुल्कमा छुट पाउने जानकारी दिएको हो ।
समितिका अनुसार सम्पुर्ण निर्जीवन बीमा कम्पनीहरुले सरकारले लकडाउन लागु गरेको दिनदेखि लकडाउन अन्त्य गरेको दिनसम्मलाई सवारीसाधन थन्किएको समय मानिस सोही अवधिको बीमा शुल्क नतिर्ने व्यवस्था मिलाउन निर्देशन दिएको छ ।
जसअनुसार लकडाउन लागु गरिएको मिति भने २०७६ चैत ११ गतेलाई मान्नु पर्नेछ । साथै अत्यावश्य सामग्रीका साधनलाई भने पास पाएको मितिसम्मलाई थन्किएको समय मान्न सकिने समितिको सर्कुलरमा उल्लेख छ ।
समितिले लकडाउनमा सवारीसाधन थन्किएको र बीमा जोखिम पनि सोही अनुसार न्युन भएकाले यसमा छुट दिन निर्देशन दिएको हो । सवारीसाधनको कुल बार्षिक शुल्कको १ तिहाई रकम कट्टा गरी बाँकी २ तिहाई शुल्कमा पनि उचित छुट दिएर शुल्क लिनुपर्ने समितिको सर्कुलरमा उल्लेख छ ।
