काठमाडौं । विश्वभर कोरोना (कोभिड–१९) भाइरस संक्रमणबाट ज्यान गुमाउनेको संख्या केहि कमी हुँदै आएको छ । कोरोना महामारीबाट सबैभन्दा आक्रान्त बनेको अमेरिकामा पनि कोरोनाबाट ज्यान गुमाउनेको संख्या केहि कम हुँदै आएको छ ।
गएको २४ घण्टामा विश्वभर कोरोनाबाट तीन हजार ४६३ जनाको ज्यान गएको र ७८ हजार ८४७ जना नयाँ बिरामी थपिएका वल्र्डओमिटरले जनाएको छ । यसअघि चार हजार २४८ जनाको ज्यान जानुका साथै ८८ हजार ९८८ जना नयाँ बिरामी थपिएका थिए ।
पछिल्लो २४ घण्टामा सबैभन्दा धेरै उत्तर अमेरिकामा २३ हजार ५०६ जना नयाँ बिरामी थपिएका छन् भने एक हजार १०६ जनाको ज्यान गएको छ । विश्वभर हालसम्म कोरोना महामारीका कारण ज्यान गुमाउनेको संख्या दुई लाख ८३ हजार ६८७ पुगेको छ । ४१ लाख ७७ हजार बढी संक्रमितमध्ये करिब १४ लाख ८८ हजार उपचार पछि निको भएका छन् ।
बेलायतमा दुई लाख १९ हजार बढी संक्रमित छन् भने मृत्यु हुनेको संख्या ३१ हजार ८५५ पुगेको छ । यस्तै स्पेनमा दुई लाख ६४ हजार ६ सय बढी संक्रमित र २६ हजार ६२१ जनाको मृत्यु भएको छ ।
इटालीमा कोरोना संक्रमितको संख्या दुई लाख १९ हजार बढी हुँदा मृतकको संख्या ३० हजार ५ सय नाघेको छ । यस्तै फ्रान्समा करिब एक लाख ७७ हजार संक्रमितमध्ये मृत्यु हुनेको संख्या २६ हजार ३ सय नाघेको छ ।
जर्मनीमा एक लाख ७१ हजार ८ सय बढी संक्रमित र सात हजार ५ सय बढीको मृत्यु भएको छ । चीनमा ८२ हजार ९ सय संक्रमित छन् भने चार हजार ६३३ जनाको मृत्यु भएको छ । यस्तै रसियामा संक्रमितको संख्या बढेर करिब दुई लाख १० हजार र मृतकको संख्या एक हजार ९१५ पुगेको छ ।
भारतमा पनि कोरोना संक्रमित र मृत्यु हुनेको संख्या थपिंदै गएको छ । करिब ६७ हजार एक सय बढी संक्रमित हुँदा मृत्यु हुनेको संख्या दुई हजार २१२ पुगेको छ । उता पाकिस्तानमा कोरोना संक्रमितको संख्या ३० हजार ३ सय बढी छ भने ६५९ जनाकोे मृत्यु भएको छ ।
