काठमाडौं । कोरोना भाईरस संक्रमित भएर उपचार पछि घर फर्कनेको संख्या ११ पुगेको छ । बागलुङ नगरपालिका–४ की १९ वर्षीया अंशु सापकोटा निको भएर घर पर्केसँगै कोरोना संक्रमित उपचार पछि घर फर्कनेको संख्या ११ पुगेको हो ।
धवलागिरि अञ्चल अस्पतालको आइसोलेसनकक्षमा उपचाररत १९ वर्षीया सापकोटा शुक्रबार राति १० बजे अस्पतालबाट घर फर्केकी हुन । लगातार पाँचौ र छैटौँ जाँचमा कोरोनाको नेगेटिभ रिपोर्ट आएपछि सापकोटालाई डिस्चार्ज गरिएको अस्पतालका प्रमुख चिकित्सक शैलेन्द्र विक पोखरलले जानकारी दिएका छन । प्रमुख चिकित्सक पोखरेलले भने, ‘उनको स्वास्थ्य अवस्था राम्रो छ, दुई हप्ता घरमा पनि अलग्गिएर बस्न लगाएका छौँ ।’
अस्पतालबाट घर फर्कने क्रममा सापकोटाले आफ्नो आत्मबल र चिकित्सक, स्वास्थ्यकर्मीको स्याहारले कोरोनालाई जित्न सफल भएको बताएकी छिन । ‘म खुसी छु, मलाई सहयोग गर्ने सबैलाई धन्यवाद दिन चाहन्छु’, ‘उनले भनिन, ‘अस्पतालमा बस्दा राम्रो हेरचाह पाएँ, परिवार र आफन्तले माया दिनुभयो ।’
बेल्जियमबाट दोहा हुँदै कतार एयरको क्यूआर ६५२ मा गत चैत ४ गते नेपाल आएकी सापकोटामा चैत १५ गते कोराना भाइरस संक्रमणको पुष्टि भएको थियो । २८ दिनको अस्पताल बसाइपछि उनी घर फर्केकी हुन । उनीसँगै एउटै विमानमा बेल्जियमबाट आएकी सोही नगरपालिका–३ की संक्रमित ६५ वर्षीया मनकुमारी पौडेल निको भएर अघिल्लो शनिबार नै घर फर्किसकेकी छिन ।
पौडेलमा गत चैत १५ गते कोरोना भाइरस संक्रमणको पुष्टि भएको थियो । सापकोटा नेपालको पाँचौँ र बागलुङको पहिलो संक्रमित हुन भने पौडेल नेपालको छैटौँ र बागलुङको दोस्रो संक्रमित हुन । दुवै संक्रमित निको भएपछि हाललाई बागलुङ कोरोनाका बिरामीमुक्त जिल्ला भएको छ ।
