काठमाडौं । वैदेशिक रोजगारीका क्रममा बहरानमा रहेकामध्ये हालसम्म ४९ नेपालीमा कोभिड–१९ को संक्रमण देखिएको त्यहाँस्थित नेपाली दूतावासले पुष्टि गरेको छ ।
दूतावासका अनुसार पछिल्लो पटक थप २७ नेपालीमा कोभिड–१९ को संक्रमण देखिएको छ । बहराइनमा आज अपराह्नसम्म कूल १ हजार ८ जनामा कोरोना संक्रमण भएको पाइएको छ । जसमध्ये तीनको अवस्था गम्भीर रहेको दूतावासले जानकारी दिएको छ ।
कूल संक्रमित मध्ये ७२५ जना निको भएर घर फर्किएको दूतावासले जानकारी दिएको छ । बहराइनमा हालसम्म ७९ हजार ५६४ जनामा कोरोना परीक्षण गरिएको छ । कोभिड–१९ बाट बहराइनमा ७ जनाको मृत्यु भएको छ ।
बहराइनले यही अप्रिल ७ देखि लागू हुने गरी अवैधानिकरुपमा बसोबास गर्दै आएका कामदारलाई वैधानिक हुन वा बहराइन छाड्न सन् २०२० को डिसेम्बरसम्म माफी दिने निर्णय गरेको दूतावासले जनाएको छ । बहराइनमा सार्वजनिक स्थानमा जाँदा अनिवार्यरुपमा मास्क लगाउनुपर्ने व्यवस्थासमेत गरिएको छ/रासस
