काठमाडौं । हजारौं नेपाली विधार्थी अध्ययनरत रहेको अस्ट्रेलियाका प्रधानमन्त्री स्कट मोरिसनले आफ्नो मुलुकमा रहेका अन्तर्राष्ट्रिय पर्यटक र विद्यार्थीलाई आफ्नो मुलुक फर्किन आग्रह गरेका छन् । यसले हजारौं नेपाली विधार्थी प्रभावित हुनसक्ने देखिएको छ ।
शुक्रबार पत्रकार सम्मेलन गर्दै उनले यो कठिन परिस्थितिमा आफ्नो घर फर्किँदा राम्रो हुने सुझाब दिएको हफिङटन पोस्टले लेखेको छ । उनले भनेका छन्, ‘तपाईं आफ्नो मुलुकमा हुँदा तपाईंले सरकारबाट उपलब्ध हुने सुविधा पनि प्राप्त गर्न सक्नुहुन्छ ।’
अस्ट्रेलियाले कोरोना संक्रमणको संकटका बेला आफ्ना नागरिक र यहाँका बासिनन्दालाई बढी ध्यान दिनुपरेको उल्लेख गर्दै आफ्नै कमाइले टिक्न नसक्ने विभिन्न मुलुकबाट आएका विद्यार्थी आ–आफ्नै मुलुक फर्किने बेला भएको बताएका छन् ।
अस्ट्रेलियाको सीमा अहिले बन्द भइनसकेको जानकारी दिँदै उनले अन्य भिसामा अस्ट्रेलियामा रहेकाहरुलाई पनि बस्नुपर्ने बाध्यता नरहेको बताए ।
अस्ट्रेलियामा अहिले कोरोना संक्रमितको संख्या पाँच हजार २२४ छ भने २७ जनाको मृत्यु भएको छ ।
