काठमाडौं । काठमाडौँ महानगरपालिकाले मानिसहरु बढी भिडभाड हुने स्थानमा औषधि छर्किन सुरु गरेको छ । बुधबारबाट सुरु गरेको उक्त किटनाशक औषधी छर्किने कार्यक्रमलाई बिहीबार पनि निरन्तरता दिएको हो । तीन ओटा क्षेत्रलाई आधार मानेर सुरु गरेको उक्त कार्य आज पनि निरन्तर रहेको काठमाडौं महानगरपालिकाका प्रमुख विद्यासुन्दर शाक्यले जानकारी दिए । उनले सिमित स्रोत–साधनको समेत उच्चतम सदुपयोग गर्दै अत्यावश्यक ठाउँमा किटनाशक औषधी छर्किने कामलाई निरन्तरता दिइरहेको बताए ।
‘सिमित स्रोत–साधनकाबीच पनि निरन्तर काम गरिरहेको उनको भनाई छ । कामका शिलसिलामा केही कमजोरी भएका छन् भने आम महानगरवासीले दिएको सुझावलाई स्वीकार गर्दै सुधारका प्रयास गर्ने मेयर शाक्यले बताए । विश्वव्यापी रुपमा फैलिएको महामारीका बेला सबैको साथ र सहयोग अपरिहार्य भएको उनको भनाई छ ।
उनले बाटो सफा गर्ने, किटनाशक औषधी छर्किनेलगायतका कामलाई ३२ वडा र अत्यावश्यक स्थानसम्म पुर्याउने पनि उनले बताय ।
यस संगै काठमाडौं प्रवेशको मुख्यद्वार नागढुङ्गा–कलङ्की सडकखण्डमा समेत कीटनाशक औषधि छरिएको छ । चन्द्रागिरि नगरपालिका र थानकोटस्थित नेपाली सेनाको टोलीले बिहीबार नागढुङ्गादेखि कलङ्कीसम्मको मुख्य सडकमा ‘हाइड्रो क्लोराइड’ नामक कीटनाशक औषधि छर्केका हुन् ।
नगरपालिकाका प्रवक्ता हरिभक्त महर्जनले कोरोना रोग नियन्त्रणका लागि केही हदसम्म सहयोग पुग्ने उद्देश्यले नागढुङ्गादेखि कलङ्कीसम्मको मुख्य सडकमा कीटनाशक औषधि छर्किएको जानकारी दिए ।
