काठमाडौं । सरकारले आजदेखि देशभरका अत्यावश्यक बाहेक सबै सेवा बन्द गरेको छ । गत शुक्रबार देशबासीको नाममा सम्बोधन गर्दै प्रधानमन्त्री केपी शर्मा ओलीले संघ, प्रदेश र स्थानीय गरी तिनै तहका सरकार, निजी क्षेत्र तथा संघसंस्थाहरुले प्रदान गर्ने राजपत्रमा प्रकाशित अत्यावश्यक बाहेकका सबै सेवा बन्द गरिने घोषणा गरेका थिए ।

सोही अनुसार आजदेखि अत्यावश्यक बाहेकका सबै सेवा बन्द गरिएको हो । पछिल्लो समय विश्वभरी फैलिएको कोरोना भाईरस (कोभिड–१९) को त्रास फैलिईरहेको छ । जसको असर नेपाली समाजमा पनि परेको छ । सरकारले नेपालमा नदेखिएको कोरोना भाईरसको प्रकोप नेपालमा फैलन नदिनका लागि विभिन्न सेवाहरु बन्द गर्ने निर्णय गरेको थियो । साही अनुसार सरकारले राजपत्रमा प्रकाशित गरिएका अत्यावश्यक सेवाहरु निम्नलिखित छन् ।

नेपाल राजपत्रमा उल्लेख भएका अत्यावश्यक यी सेवा बन्द हुनेछैनन ।

१. डाँक, तार वा टेलिफोन सेवा
२. जल, स्थल वा हवाईमार्गबाट यात्री वा मालसामान ओसार पसार गर्न यातायात सेवा
३. हवाई अड्डा वा हवाई जहाजको देखभाल, त्यसको सञ्चालन वा मर्मत गर्ने कामसँग सम्बन्धित सेवा
४. हवाई ग्राउन्ड, रेलवे स्टेसन वा सरकारी गोदममा मालसामान ओसार पसार गर्ने वा राख्ने झिक्ने वा थन्क्याउने कामसँग सम्बन्धित सेवा

५. प्रिन्ट वा सरकारी छापाखानासम्बन्धी सेवा
६. हातहतियार खरखजाना वा अरु कुनै सैनिक सरसामानको उत्पादन गर्ने, थन्क्याउने, वितरण गर्ने कामसँग सम्बन्धित नेपाल सरकार रक्षा व्यवस्थाको कुनै सेवा
७. सञ्चार सेवा

८. आन्तरिक सुरक्षा कार्यसँग सम्बन्धित सेवा
९. खानेपानीको सञ्चालन तथा वितरण सेवा
१०. पर्यटन आवास, मोटल, होटल, रेष्टुँरा र रिसोर्टसम्बन्धी सेवा
११. पेट्रोलिम पदार्थको पैठारी, ढुवानी, भण्डारण तथा वितरणसम्बन्धी सेवा
१२. अस्पताल, स्वास्थ्य केन्द्र र औषधि निर्माण तथा बिक्री वितरणसम्बन्धी सेवा

१३. फोहरमैलाको संकलन, ढुवानी, प्रशोधन, बिसर्जन, स्थान निर्माण, पूर्वाधार निर्माण र संकलन स्थल एवं व्यवस्थापनसँग सम्बन्धित सेवा
१४. बैंकिङ सेवा
१५. बिमा सेवा

१६. विद्युत् सेवा
१७. दैनिक उपभोग्य वस्तुहरू (खाद्यान्न, दालचामल, नुन, तेल)को पैठारी, ढुवानी, भण्डारण तथा वितरणसम्बन्धी सेवा