काठमाडौं । अर्थमन्त्री डा युवराज खतिवडाले आफु अर्थमन्त्री भएको र अर्थमन्त्रीको काम नै कर उठाउने भएको बताएका छन् । उनले कर उठाउने बिषयमा आफु कडा नै भएको बताउँदै अर्थमन्त्रीको काम नै कर उठाउने भएको उल्लेख गरे ।
आइतबार राष्ट्रिय बीमा संस्थानको ५३ औं बार्षिकोत्सवलाई सम्बोधन गर्दै उनले भने, ‘अर्थमन्त्रीको काम कर उठाउने हो र जनतालाई नै वितरण गर्ने हो ।’
करका विषयमा विभिन्न गुनासाहरु आइरहेकाो सन्दर्भमा उनले भने, ‘धैरै कमाउनेबाट कर लिने हो । र, कमाउन नसक्नेलाई दिने हो । तपाईहरु कर छुट नै छुट भन्नु हुन्छ । तपाईहरुलाई कर छुट दिँदा त्यो काम कसरी गर्ने । हामी श्रमजीवी बर्ग, तल्लो बर्ग तथा गरिबीको उत्थान गर्ने पार्टी भन्छौ । उनीहरूको उत्थान कहिले गरिदिने, हामीले नगरे कसले गर्ने । त्यसले म करको बिषयमा कठोर नै छु साथीहरु ।’
यस्तै अर्थमन्त्री डा खतिवडाले बीमा योजनामा आधारित समाजिक सुरक्षामा जनतालाई समेट्न सकिएमा सबैखाले सामाजिक सुरक्षा योजना सफल हुने बताए । उनले भने, ‘सामाजिक सुरक्षा नागरिकको मौलिक हक हो भनिएको छ, बीमा योजना योगदानमा आधारित सामाजिक सुरक्षा हो, यसमा बढीभन्दा बढी नागरिकलाई ल्याउन सकियो भने सबैलाई सामाजिक सुरक्षा भनेर घोषणा गरिएको सर्वव्यापी लक्ष्य र अवधारणा पूरा हुन्छ ।’
अर्थमन्त्री खतिवडाले भने, ‘अहिले मुलुकमा कूल जनसङ्ख्याको २२ प्रतिशतमा जीवन बीमा पुगिसकेको छ । बीमाको दायरा अझै बढाउन नागरिकको पहुँच विस्तार गर्नुपर्छ, जसको पहुँच वित्तीय रुपमा पुग्दैन उसलाई सरकारले सहयोग गर्छ, निरपेक्ष गरिबीको रेखामुनि चरम गरिबीमा रहेकालाई बीमाको प्रिमियम तिर्न पैसा पुग्दैन भने त्यसलाई सरकारले सहयोग गर्छ ।’
चरम गरिबीमा रहेका परिवारको सङ्ख्या करिब १६ लाख ५० रहेको जानकारी दिँदै उनले सरकारले अहिले एक परिवारले तीन हजार ५०० मा वार्षिक एक लाखबराबरको सुविधा प्राप्त गर्ने गरी व्यवस्था मिलाइएकामा त्यो सुविधा गरिबीको रेखामुनि रहेकालाई निःशुल्क गर्ने तयारी रहेको घोषणा गरे ‘त्यो निःशुल्क गरेपछि एकैपटक १६ लाखभन्दा बढी परिवारका ७०-७५ लाख व्यक्ति बीमाको दायरामा आउनुहुन्छ, हामीले अघि बढाएको बीमाबाट पनि गरिबी निवारणमा योगदान पुग्नेछ, बीमा संस्थानबाट क्षतिपूर्तिको छिटो भुक्तानी भएका कार्यक्रम विस्तार हुन सहयोग पुग्नेछ’, अर्थमन्त्री खतिवडाले भने ।
‘ठूला र धनी वर्गलाई मात्र हेर्ने होइन, सानालाई बेवास्ता गर्दा सरकारले अघि बढाएको बीमा विस्तारमा सहयोग पुग्दैन, बीमा विस्तार हँुदैन, पुरानो संस्थानलाई नयाँ ढाँचामा चलाउन प्रयास गरौँ,’ उनले भने। अध्यक्ष गङ्गाराम कँडेलले बीमा क्षेत्रमा विश्वसनीय संस्थाका रुपमा प्राप्त गरिरहेको छविलाई थप प्रभावकारी तुल्याउन संस्थालाई प्रविधिमैत्री र समयसापेक्ष तुल्याउन भइरहेका प्रयासबारे जानकारी दिए ।
