काठमाडौं। नेपाल कम्युनिस्ट पार्टीका दुई अध्यक्ष केपी शर्मा ओली र पुष्पकमल दाहालबीच अग्नी सापकोटालाई सभामुख बनाउने सहमति जुटेको छ ।
प्रधानमन्त्री निवास बालुवाटारमा बिहान ९ बजेबाट चलेको छलफलमा दुई अध्यक्षबीच सापकोटालाई सभामुख बनाउने सहमति जुटेको हो । सापकोटाको नाममा सहमति भए पनि अहिले औपचारीक रुपमा भने नाम सार्वजनिक गरेको छैन ।
सभामुखको उम्मेद्वार टुंगो लगाउन नेकपाको सचिवालय बैठक बेलुकी ४ बजे बस्ने भएको छ। प्रधानमन्त्री ओली र नेकपाका अर्का अध्यक्ष पुष्पकमल दाहाल प्रचण्डबीच छलफलपछि सचिवालय बैठक डाकिएको हो । ४ बजे बस्ने सचिवलय बैठकबाट सभामुखको उम्मेद्वारको नाम अनुमोदन गरिने स्रोतले जानकारी दिएको छ ।
गत शनिबार बसेको नेकपा सचिवालय बैठकले उपसभामुख शिवमाया तुम्बाहाङ्फेलाई पदबाट राजीनामा दिन निर्देशन दिइएको थियो। तर, उपसभामुख तुम्बाहाङ्फेले सभामुखको उम्मेदवार चयन नहुँदासम्म राजीनामा नदिने अडान लिएकी छिन ।
सभामुखको विषयमा गत आइतबारपछि बिहीवार र शुक्रवार अध्यक्षबीच छलफल भएको थियो। प्रधानमन्त्रीले पूर्व सभामुख सुवास नेम्वाङ र प्रचण्डले स्थायी समिति सदस्य अग्नि सापकोटालाई सभामुखको उम्मेद्वारका रुपमा अघि सारेका थिए।
यता नेकपाका केही नेताहरु भने प्रस्तावित व्यक्तिभन्दा अन्य सभामुखको उम्मेदवार हुन सक्ने सम्भावना बढिरहेको बताउँदै आएका छन्।
