काठमाडौं । संस्कृति, पर्यटन तथा नागरिक उडड्यन मन्त्री योगेश भट्टराईले नेपाल एयरलाइन्सलाई नेपाल भ्रमण वर्ष–२०२० लक्षित कार्ययोजना बनाएर तुरुन्त पेश गर्न निर्देशन दिएका छन् । बुधबार मन्त्रालयको चौमासिक समीक्षा बैठकमा बोल्दै मन्त्री भट्टराईले मन्त्रालय अन्तर्गतका विभिन्न निकायलाई जिम्मेवारीपूर्वक काम गर्न कडा निर्देशन दिएका छन् ।
मन्त्री भट्टराईले निगमलाई भ्रमण वर्षको लागि के–कस्तो छुट तथा प्याकेज ल्यान सकिन्छ भन्ने स्पष्ट योजना ल्याउन निर्देशन दिए । ‘नेपाल एयरलाइन्का यात्रु अरु कसैले नलैजाओस । जसका लागि कति जहाज, पाइलट, गन्तब्य थप्नुपर्ने हो । त्यसका लागि स्पष्ट खाका बनाएर मन्त्रालयमा पेश गर्नुहोला’, मन्त्री भट्टराईले भने ।
मन्त्रालय अन्तर्गतका कतिपय कार्यालयहरुको कार्यक्षमता निकै कमजोर रहेको बताउँदै भट््टराईले तुरुन्त कार्यक्षमता सुधार्न पनि निर्देशन दिए । ‘जसले जिम्मेवारी पूरा गर्न सकदैन । त्यसले ठाउँ खाली गर्नुपर्छ । यस्तो राजनितीक नियुक्ति लिएर आएको छ, उसलाई मन्त्रालयले हटाउँछ । त्यतिबेला अदालत गएर पदबहाली गर्नुको कुनै औचित्य छैन्’, उनले भने ।
यसैगरी कर्मचारीहरुमा पनि लक्ष्य अनुसार काम पूरा गर्ने जिम्मेवारी रहेको र सो कुरालाई पालना गर्न उनले सजग गराए । ‘लक्ष्य अनुसार काम नगर्नेलाई बिदेश भ्रमणको फाइल मबाट स्वीकृत हुँदैन । बिचार गर्नुहोला’, मन्त्री भट्टराईले भने । मन्त्री भट्टराईले मातहतका सबै कार्यालयलाई आफ्नो कामको प्रत्येक शुक्रबार समीक्षा गर्न पनि निर्देशन दिएका छन् ।
