बिजखबर संवाददाता
२१ जेठ, काठमाडौं । अर्थमन्त्री डा रामशरण महतले एसियाली विकास बैंक (एडीवी)ले दिएको सहयोग पुनर्निर्माणमा खर्च गर्न चाहेको बताए । ‘सहयोग रकमलाई सडक, सिंचाई र विद्यालयहरुको निर्माणमा खर्च गर्न चाहेका छौं,’ अर्थमन्त्रालयमा एडीवीका महानिर्देशक हुँ किमसँगको भेटमा उनले भने, ‘बैंकबाट प्राप्त हुने सहयोग प्राविधिकभन्दा पनि बढी पुँजीगत खालको चोहका छौं ।’
भेटमा आगामी असार १० मा हुने नेपाल सहायता सम्मेलन र नेपालको पुनर्निर्माणमा बैंकको सहयोगका बारेमा पनि छलफल भएको थियो ।
अजरबैजानको बाकुमा हालै सम्पन्न बैठकमा नेपालको पुनर्निर्माणमा बैंकले २० अर्ब रुपैयाँ बराबरको सहयोग घोषणा गरेको थियो । अर्थमन्त्री डा रामशरण महतले भूकम्पले ध्वस्त भएको नेपालको पुनर्निर्माणका लागि ५ देखि १० खर्ब रुपैयाँ सम्म लाग्नसक्ने प्रारम्भिक अनुमानको जानकारी गराएका थिए । सोही कार्यंक्रममा बैंकले नेपालको पुनर्निर्माणमा सक्रियरुपमा सहभागी हुने घोषणा गरेको थियो ।
सोही सहयोगका बारेमा छलफल गर्न बैंकका महानिर्देशक हुँ किम हालै नेपाल भ्रमणमा छन् । बिहीबार भएको भेटमा अर्थमन्त्री महतले नेपाल सहायता सम्मेलनमा बैंकको उच्च नेतृत्वको सहभागिता चाहेको बताएका छन् । सो भेटमा बैंकले घोषणा गरेको भन्दा केही बढी सहयोग र अनुदान सहयोगका बारेमा पनि छलफल भएको थियो ।
सो अवसरमा बैंकका महानिर्देशक किमले नेपालको पुनर्निर्माणमा सहयोग गर्न तयार रहेको र पूर्वाधारका क्षेत्रमा सहयोग गरिने जानकारी दिए ।
भेटघाट तथा छलफल कार्यक्रममा अर्थसचिव सुमनप्रसाद शर्मा, सहसचिव मधुकुमार मरासिनी तथा बैंकको तर्फबाट राष्ट्रिय निर्देशक केनिची योकोयामा लगायतका अधिकारीहरुको उपस्थिति रहेको थियो ।
