काठमाडौं । सरकारले चालू आर्थिक बर्षको जेठ मसान्तसम्म अवैधानिक तरिकाले भित्रिएको २ सय २२ किलोग्राम सुन बरामद गरेको छ । चालु आर्थिक बर्षको जेठ मसान्तसम्म कर छली गर्दै विभिन्न नाकाबाट भित्रिएको २ सय २२ किलो सुन बरामद गरिएको राजस्व अनुसन्धान विभागले जानकारी दिएको छ ।
विभागका अनुसार जेठ मसान्तसम्म राजस्व चुहावटका ८१ वटा कसुरमा अनुसन्धान सम्पन्न गरी मुद्दा दायर गरिएको छ । विभागले राजस्व चुहावटको कसुरमा २ सय ३८ जना उपर विगो दावी तथा जरिवाना वापतको १८ अर्ब ३२ करोड रुपैयाँ माग दावी गरेको जानकारी दिएको छ ।
यस्तै राजस्व चुहावटको मुद्दामा मुछिएका कसुरदारलाई विभागले ३ बर्षसम्मको कैद माग गरिएको समेत जानकारी दिएको छ । यस्तै विभागले हुण्डी कारोबारमा आवद्ध १ सय ४ जनालाई विदेशी विनिमय अपचलन तथा हुण्डीको कसुरमा मुद्धा दायर गरेको छ । हुण्डीमा आवद्ध उनीहरुलाई ५ अर्ब ११ करोड रुपैयाँ विगो कायम गरी विगोको तेब्बरसम्म जरिवाना लिने समेत विभागले जानकारी दिएको छ ।
