काठमाडौं । अन्तरराष्ट्रिय बजारमा पेट्रोलियम पदार्थको मूल्य बढेसँगै त्यसको असर नेपाल आयल निमग (एनओसी) माथी पर्ने गएको छ ।
पछिल्लो समय इन्डियन आयल कर्पोरेशन (आईओसी)ले ग्याँस तथा पेट्रोलियम पदार्थको मूल्य बृद्धि गरेसँगै निगमको घाटा उच्च रुपमा बढ्न पुगेको निगमका निमित्त प्रबन्ध निर्देशक सुशील भट्टराईले जानकारी दिए ।
आईओसीले एनओसीलाई यही सेप्टेम्बर १ मा पठाएको मूल्य सूची अनुसार निगमलाई मट्टीतेल र हवाई इन्धन बाहेक सबैमा घाटा रहेको छ । यदि नयाँ मूल्य अनुरुप समायोजन नगर्ने हो भने निगमले पेट्रोलमा प्रती लिटर १ रुपैयाँ ११ पैसा, डिजेलमा २ रुपैयाँ ८४ पैसा र ग्याँसमा प्रति सिलिण्डर ३ सय ३१ रुपैयाँ ९१ पैसा घाटा व्यहोर्नुपर्ने देखिन्छ ।
जस अनुसार निगमले १५ दिनमा पेट्रोलबाट २ करोड ३९ लाख, डिजेलबाट १९ करोड ३२ लाख र एलपीजी ग्याँसबाट ३९ करोड ५८ लाख रुपैयाँ घाटा व्यहोर्नुपर्ने हुन्छ ।
आईओसीबाट प्राप्त नयाँ मूल्य अनुसार निगमलाई मट्टीलेल र हवाई इन्धनमा भने केही फाइदा रहेको छ । जस अनुसार निगमले मट्टीतेलबाट १५ दिनमा १ करोड ८१ लाख र हवाई इन्धनबाट २७ करोड ९० लाख रुपैयाँ नाफा हुने देखिन्छ । तर, समग्रमा निगमले नयाँ मूल्य अनुसार पाक्षिक घाटा ३१ करोड ५९ लाख रुपैयाँ व्यहोर्नुपर्ने उनको भनाई थियो ।
पछिल्लो समय दैनिक रुपमा अमेरिकी डलरको मूल्य बृद्धि र अन्तरराष्ट्रिय बजारमा भइरहेको कच्चा तेलको मूल्य बृद्धिका कारण नेपालमा पनि पेट्रोलियम पदार्थको मूल्य बढ्न पुगेको उनको भनाई थियो । ‘केही समय अघि प्रति ब्यारल ७२ डलर रहेको कच्च तेलको मूल्य बढेर अहिले ७७ डलर पुगेको छ,’ उनले भने, ‘यसैगरी भारतसँगको तुलनमा नेपालमा पेट्रोलमा २६ रुपैयाँ र डिजेलमा २८ रुपैयाँ सस्तो भईसक्यौं ।’ यसअघि भारतमा भन्दा नेपालमा पेट्रोल २३ रुपैयाँ र डिजेल २५ रुपैयाँ सस्तो रहेको थियो ।
अब तत्काल पेट्रेलियम पदार्थ तथा ग्याँसको मूल्य बृद्धि नगरे निगमको घाटा उच्च रुपमा चुलिने समेत उनको गुनासो थियो । ‘हामीले अबका दिनमा पेट्रोलियम पदार्थको मूल्य कसरी समायोजन गर्ने भन्ने विषयमा सरोकारवाला निकायसँग छलफल गरिरहेका छौं,’ उनले भने, ‘लामो समयदेखि स्थिर रहेको ग्याँसको मूल्य यसपटक बढ्न सक्छ ।’
