विजखबर संवाददाता
३ चैत, काठमाडौं । व्यवस्थापिका संसद अन्तर्गतको कृषि तथा जल स्रोत समितिले पश्चिम सेती आयोजना तत्काल अगाडि बढाउन निर्देशन दिएको छ । मंगलवार बसेको समितिको बैठकले पश्चिम सेती आयोजना निर्माणमा विलम्ब नगर्न सरकारलाई निर्देशन दिएको हो ।
समितिका सभापति गगनकुमार थापाको अध्यक्षतामा बसेको बैठकले लगानी बोर्डलाई मन्त्रालयसँग समन्वय गरि १ महिना भित्र निकासको प्रष्ट सुझाव सहित पेस गर्न निर्देशन दिएको छ ।
यसअघि समितिले उर्जा मन्त्रालय र लगानी बोर्डलाइ समन्वय गरेर काम गर्न निर्देशन दिएको थियो। बैठकमा सभासद्हरुले तत्कालीन अवस्थामा भएको समझदारीपत्र परिवर्तित समयअनुसार संशोधन गर्नुपर्ने बताए । साथै आयोजनामा २५ प्रतिशत लगानी सरकारले गर्नुपर्ने सर्त मान्न नहुने धारणा व्यक्त गरेका थिए ।
सभासदहरुले सुदूर पश्चिमाञ्चलका जनताका विकासका आकाङ्क्षा पूरा गर्न उक्त आयोजना चाँडो निर्माणको प्रक्रियामा अघि लैजान आग्रह गरे । समितिले जलाशाययुक्त ७ सय५० मेगावाटको आयोजना अगाडि बढाउनका लागि लगानीकर्तासँग वार्ता गर्न समेत लगानी बोर्डलाई निर्देशन दिएको छ ।
